काठमाडौं – नेपाल र भारतबीचको द्विपक्षीय आर्थिक तथा विकास परियोजनाको प्रगतिका विषयमा समीक्षा गर्नका लागि बुधवार नेपाल–भारत निगरानी संयन्त्रको छैठौं बैठक सम्पन्न भएको छ । 

बैठकलाई परराष्ट्रसचिव शंकरदास वैरागी र नेपालका लागि भारतका राजदूत मञ्जीव सिंह पुरीले संयुक्त अध्यक्षता गरेका थिए । 

बैठकमा नेपाल र भारतबीच चलिरहेका सबै द्विपक्षीय परियोजनाको कार्यान्वयन स्थितिको चर्चा गरिएको थियो । 

तोकिएको अवधिमा परियोजना सुचारु रूपमा सम्पन्न गर्नका लागि सबै आवश्यक चाँजोपाँजो मिलाउने प्रतिबद्धता व्यक्त गर्दै दुवै पक्षले कार्यान्वयन नियोगका सबै समस्या शीघ्र सम्बोधन गर्ने विषयमा सहमति जनाए । 

नेपालका प्रधानमन्त्रीले सन् २०१६ को सेप्टेम्बरमा गरेको भारतको राजकीय भ्रमणमा सहमति भएबमोजिम नेपाल–भारत निगरानी संयन्त्र गठन गरिएको थियो । तोकिएको मितिमा सबै चालु द्विपक्षीय परियोजना कार्यान्वयनको समीक्षा गर्न यसको गठन गरिएको थियो । 

संयन्त्रको सातौं बैठक दुवै देशलाई अनुकूल हुने मितिमा बस्नेछ ।