दमक – चिनिया अधिकारीले प्रधानमन्त्री केपी शर्मा ओलीको गृहजिल्ला झापाका ९ वटा नदीमा तटबन्ध निर्माणको गुरुयोजना बनाउन प्रारम्भिक सर्वेक्षणको काम शुरू गरेका छन् ।

चिनिया प्रविधिज्ञ याउको नेतृत्वमा आएको ७ सदस्यीय टोलीले आजदेखि सर्वेक्षण शुरू गरेका हुन् । तीमध्ये केही पूर्वाधार विज्ञ छन् । टोलीले झापाको मावा, रतुवा, कमल बनियानी, कृष्णे, सतासी, कन्काइ, बिरिड्ग, निन्दा र हडिया नदीको वस्तुस्थितिको अध्ययन गर्नेछ । टोलीले पहिलो दिन आज झापा र मोरङमा पर्ने मावा नदीको अध्ययन गरेको छ ।

जिल्ला समन्वय समिति झापाका प्रमुख सोमनाथ पोर्तेलका अनुसार जिल्लाका मुख्य सबै नदीको बहाव नियन्त्रण गर्न गुरुयोजना बनाउन चिनिया प्राविधिक टोलीले स्थलगत अध्ययन शुरू गरेको हो । टोलीले नदीको अध्ययन गरी सरकारलाई प्रतिवेदन बुझाउने छ । त्यसै आधारमा यसै वर्षदेखि तटबन्धको काम शुरू गर्ने सरकारको योजना छ । 

चिनिया टोलीले १५ दिन जिल्लामा बसेर झापाका मुख्य नदीहरूको अध्ययन गर्ने छन् । जिल्ला समन्वय समितिका प्रमुख पोर्तेलले प्रधानमन्त्री केपी शर्मा ओली चीन भ्रमणमा जाँदा भएको समझदारीअनुरुप टोली अध्ययनका लागि आएको बताए ।

टोलीले समग्रमा झापाका ९ वटा मुख्य नदीको वस्तुस्थितिको अध्ययन गर्नुका साथै स्थानीय तहका प्रमुख र प्रभावित क्षेत्रका वासिन्दाका मागको समेत अध्ययन गर्ने उनले जानकारी दिए । यी नदीबाट प्रत्येक वर्ष जिल्लाका ४० हजार जनसंख्या प्रभावित हँुदै आएका छन् ।