धनगढी-अख्तियार दुरुपयोग अनुसन्धान आयोग कञ्चनपुरको एक टोलीले आज (बुधबार) प्रधानमन्त्री कृषि आधुनिकीकरण परियोजना (गहुँ सुपरजोन) प्रमुखलाई घुससहित रंगे हात पक्राउ गरेको छ ।

 प्रहरी नायब उपरिक्षक प्रेमसागर केसीका अनुसार परियोजना प्रमुख तथा वरिष्ठ कृषि विकास अधिकृत रामनन्दन प्रसाद यादवलाई २५ हजार घुस सहित पक्राउ  गरिएकाे हाे ।

कैलालीको कैलारी गाउँपालिका–८ मा लौसास्थित कार्यालयमा सेवाग्राहीवाट घुस वापतको २५ हजार नगद रुपैया लिइरहेको अवस्थामा पक्राउ गरेको प्रहरी नायब उपरिक्षक केसीले जानकारी दिए । 

सो परियोजनाले गहुँ सुपरजोन कार्यक्रमलाई गत वर्षदेखि सञ्चालन गर्दै आएको छ । सो कार्यक्रमको श्रव्य दृष्य निर्माणमा सेवाग्राहीबाट रकम लिइरहेको अवस्थामा पक्राउ गरेको उनले बताए । तर कोबाट लिइरहेको भन्ने बारे भने उनले खुलाउन चाहेनन् । 

परियोजना प्रमुख यादवलाई आज कञ्चनपुर लगेको अख्तियारको टोलीले भोलि काठमाडौं पठाइने जनाइएको छ ।