काठमाडौं – थाइल्यान्डको गुफामा फसेका १२ किशोर र उनीहरूका फूटबल प्रशिक्षक उद्धारपछि पहिलोपटक बुधवार मिडियासमक्ष आए । किशोरहरू र उनीहरूका प्रशिक्षकले पत्रकार सम्मेलनमा उद्धारलाई ‘चमत्कार’ संज्ञा दिँदै दुई
हप्ताभन्दा बढी समय गुफामा कसरी बिताए र उनीहरूको जीवनमा यो घटनाको के असर पर्छ सुनाए । 

प्रशिक्षक एकापोलका अनुसार, टोलीका केही किशोरहरू गुफामा कहिले पनि गएका थिएनन् र उनीहरू त्यो भित्रैबाट हेर्न चाहन्थे । फूटबल अभ्यासपछि टोलीले विभिन्न किसिमका गतिविधिमा संलग्न हुनुपर्ने आवश्यकता रहेको एकापोलले बताए । 

गुफामा एक घन्टा बसेपछि टोलीले फर्किने निर्णय लियो । तर त्यतिखेरसम्म गुफामा पानी भरिसकेको थियो र उनीहरू बाहिर निस्कने बाटो बन्द भइसकेको थियो । 

त्यसपछि एक किशोरले भने, ‘हामी हरायौं त ?’ त्यसपछि आफूहरू फसेको अनुभव भएको प्रशिक्षकले बताए । अनि टोली गुफाभित्र अझै पस्यो र राति कतै सुरक्षित बस्ने योजना बनायो । 

एकापोलले बताएअनुसार, गुफामा २०० मिटर अझै भित्र गएपछि अलिकति उकालोजस्तो देखियो । एकापोललाई गुफाको छतबाट पानी चुहिरहेको र यो पानी गुफाभित्र छिरेको बाढीको पानीभन्दा बढी सफा हुनसक्ने थाहा थियो । 

पानीनजिक बस्नु ठीक हुने उनले अनुमान गरे । उनीहरूसँग केही खानेकुरा थिएन । पानी पिएर उनीहले पेट भरे । 

टोलीका सबभन्दा साना ११ वर्षीय खेलाडी चानिनले भने, ‘मैले खाने विषयमा नसोच्ने कोशिश गरें किनकि यसो गर्दा मलाई भोक लाग्न सक्थ्यो ।’ 

एकापोलले बताएअनुसार, टोलीमा कोही पनि डराएको थिएन । भोलिपल्ट जलस्तर घट्नेछ र सहायताका लागि कोही आउनेछ भन्ने उनले आशा राखे । 

एकचोटि त पानीको तीव्र प्रवाहको आवाज सुनेपछि उनीहरूले हेर्दा पानी बढ्दै गएको देखे । अनि त डुबिएला भन्ने आशंकामा एकापोलले टोलीलाई अग्लो ठाउँ खोज्न लगाए । त्यति मात्र नभई उनले सबै किशोरहरूलाई बाहिर निस्कने सम्भावना खोज्नका लागि खन्न लगाए । 

पूर्व थाइ नेभी सील कमान्डर समन कुनानको मृत्यु उद्धारका क्रममा भएको थाहा पाएपछि कोच एकापोलले आफूलाई दोषी अनुभव गरेको बताए । 

किशोरहरूले पत्रकार सम्मेलनका क्रममा सबै उद्धारकर्मीलाई धन्यवाद दिए र कुनानप्रति श्रद्धाञ्जलि दिए । 

बेलायती गोताखोर गुफामा पस्दा उनीसँग अंग्रेजीमा कुराकानी गर्ने १४ वर्षीय अदुन स्याम–ओनको चर्चा भयो । बुधवार अदुनले बताएअनुसार, उनले गुफामा खन्दै गर्दा केही मानिसले बोलेको सुने । 

प्रशिक्षकले किशोरहरूलाई हल्ला नगर्न भने । 

बेलायती गोताखोर त्यहाँ पुग्दा उनी आत्तिएका जस्ता देखिन्थे । उनी खालि हेलो मात्र भन्न चाहन्थे । अदुनले त्यो क्षणलाई याद गर्दै भने, ‘मलाई यो चमत्कार झैं लाग्यो । कस्तो प्रतिक्रिया दिऊँ भनी मैले थाहै पाइनँ ।’

यो घटनाबाट के पाठ पाइयो भनी गरिएको प्रश्नमा प्रशिक्षक एकापोलले भने, ‘अब हामी जिन्दगीका विषयमा लापरवाही गर्दैनौं ।’

केही किशोरहरूले चाहिँ ठूलो भएपछि नेभी सील ज्वाइन गर्न चाहेको बताए । केही किशोरहरूले आफ्ना आमाबुवासँग माफी पनि मागे । 

एजेन्सी