सुर्खेत– जुम्लाबाट डा. गोविन्द केसीलाई लिएर उडेको हेलिकप्टर कर्णाली प्रदेशको राजधानी सुर्खेत पुगेको छ । 

नेपाली सेनाको हेलिकप्टर कर्णाली प्रदेशका मुख्यमन्त्री महेन्द्रबहादुर शाही, आन्तरिक मामिला तथा कानून मन्त्री नरेश भण्डारीलाई सुर्खेतमा छोडेर काठमाडौं जानेछ । 

विगत २० दिनदेखि जुम्लामा रहेको कर्णाली स्वास्थ्य विज्ञान प्रतिष्ठानमा अनशन बसेका डा. गोविन्द केसीको स्वास्थ्य जटिल बनेपछि सरकारी टोली  डा. केसीलाई काठमाडौं ल्याउन जुम्ला पुगेको थियो । 

आफूलाई सरकारले अपहरण गरेर काठमाडौं लान खोजेको भन्दै डा. केसीले विहीवार विहान आपत्ति जनाएपछि उनका समर्थकले डा. केसीलाई काठमाडौं लैजान अवरोध सिर्जना गर्न खोजेका थिए । त्यसपछि प्रहरीले बल प्रयोग गरेको थियो । प्रहरीले बल प्रयोग गर्दा २० जना भन्दा बढी सर्वसाधारण घाइते भएका छन् । 

सरकारी हेलिकप्टरमा काठमाडौं नआउने अडानमा रहेका गोविन्द केसीलाई प्रशासनले बल प्रयोग गरेर भएपनि लैजाने बताएपछि प्रहरी दनम रोक्न भन्दै डा. केसी काठमाडौं जान तयार भएका थिए । 

सरकारले ल्याउन लागेको राष्ट्रिय चिकित्सा शिक्षा विधेयक माथेमा आयोगले दिएको सुझावको आधारमा हुनुपर्ने माग राख्दै डा. केसी २० दिनदेखि अनशनमा छन् । उनको यो १५ औं अनशन हो ।