काठमाडौं – पाकिस्तानको एक उच्च अदालतका न्यायाधीशले शनिवार देशको शक्तिशाली जासूसी संस्था आर्ईएसआईमाथि गम्भीर आरोप लगाएका छन् ।

आईएसआईलाई फाइदा हुने गरी फैसला दिनका लागि प्रधानन्यायाधीश र अन्य न्यायाधीशलाई दबाब दिइरहेको उनले बताए । 

अयोग्य भनिएका पूर्वप्रधानमन्त्री नवाज शरीफको विषय पनि यसमा संलग्न छ । आईएसआई बुधवार हुन गइरहेको आमचुनावअघि नवाज शरीफलाई जेलबाट बाहिर नआऊन् भन्ने अपेक्षा गर्छ ।

रावलपिण्डी बार एसोसिएसनमा सम्बोधन गर्दै इस्लामाबाद उच्च अदालतका न्यायाधीश शौकत सिद्दीकीले न्यायपालिका र मिडियालाई नियन्त्रित गर्ने कोशिश गरेको भन्दै आईएसआईको आलोचना गरे । 

उनले भने, ‘अहिले न्यायपालिका र मिडिया सेनाको नियन्त्रणमा छ । न्यायपालिका स्वतन्त्र छैन । मिडियालाई पनि सेनाले निर्देशन दिन्छ । दबाबमा भएकाले मिडिया पनि साँचो बोल्दैन अनि उसको आफ्नै स्वार्थ पनि छ । फरक फरक मुद्दामा
आईएसआईले आफूले चाहेको परिणाम प्राप्त गर्नका लागि आफैं इजलास तोक्छ ।’

सिद्दीकीले थपे, ‘आईएसआईले प्रधानन्यायाधीशलाई नवाज शरीफ तथा उनकी छोरी मरियमलाई चुनावभन्दा अघि जेलबाट ननिस्कने सुनिश्चित गर्न भनेको छ । यति मात्र नभई एभेनफील्ड मुद्दामा नवाज र उनकी छोरीको पुनरावेदनको सुनुवाइ
गर्ने इजलासमा मलाई नराख्न पनि भनेको छ । प्रधानन्यायाधीशले आईएसआईलाई उनीहरूले चाहेबमोजिमको इजलास तोक्ने बताएका छन् ।’

इजलासले शरीफ परिवारका सदस्यहरूको अपीलमा सुनुवाइ चुनावपछि गर्न निश्चित गरेको छ । नवाज र मरियम दुवै एभेनफील्ड भ्रष्टाचार मुद्दामा रावलपिण्डीस्थित अदियाला जेलमा क्रमशः १० र सात वर्षको सजाय काटिरहेका छन् ।

एजेन्सी