काठमाडौं – रुसका राष्ट्रपति भ्लादिमिर पुटिनले मस्को र वाशिङटनको सम्बन्ध बिगार्न खोज्ने व्यक्तिहरू अमेरिकामै रहेको बताएका छन् । अघिल्लो हप्ता अमेरिकाका राष्ट्रपति डोनल्ड ट्रम्पसँग हेल्सिन्कीमा शिखर वार्ता गरेका पुटिनले यस्तो बयान दिएका छन् । 

मस्कोमा सबै रुसी राजदूतलाई सम्बोधन गर्दै उनले भने, ‘आफ्नो महत्त्वाकांक्षाका लागि रुस र अमेरिकाको सम्बन्धमा नोक्सानी गर्नका लागि अमेरिकाका केही तत्त्वहरू सल्बलाइरहेका छन् ।’

उनले भने, ‘अमेरिकामा केही यस्ता तत्त्व छन् जो राष्ट्रिय हितको तुलनामा आफ्नो पार्टीको संकीर्ण हितलाई बढी नै महत्त्व दिन्छन् ।’

यति भएपनि रुसले समानताका आधारमा अमेरिकासँग सम्बन्ध विस्तार गर्ने उनले बताए । 

‘सँगै मिलेर काम गनेए र साझा आधार खोज्ने एक नयाँ सकारात्मक एजेन्डा हामीलाई चाहिएको छ । ट्रम्पसँगको भेटघाटमा हामीले यही कुराकानी गरेका थियौं ।’

ट्रम्प र पुटिनको भेटघाटलाई अमेरिकाको राजनीतिक वृत्तमा उपहास गरिएको थियो र रोषसमेत प्रकट गरिएको थियो । 

अमेरिकामा सन् २०१६ मा भएको राष्ट्रपति निर्वाचनमा रुसको हस्तक्षेप भएको कुरालाई संयुक्त पत्रकार सम्मेलनमा अस्वीकार गरेकाले ट्रम्पको कडा आलोचना भएको थियो ।

एजेन्सी