काठमाडौं – नेपाल र चीनले असोज १ गतेदेखि १० दिनको संयुक्त सैन्य अभ्यास गर्ने भएका छन् । विपद व्यवस्थापन र आतंक प्रतिरोधमा यो अभ्यास केन्द्रित हुनेछ । 

लामो समयपछि भारत र अमेरिकासँग संयुक्त अभ्यास गरेको नेपाली सेनाले चीनको जनमुक्ति सेनासँग सहकार्य गर्न लागेको हो ।

सगरमाथा फ्रेन्डशिप नाम दिइएको यो सैन्य अभ्यास चीनको सिचुआन प्रान्तको राजधानी चेङ्दुमा गरिनेछ । 

नेपाली सेनाले भन्यो, ‘पल्टन स्तरको प्रशिक्षणको नेतृत्व दुवै पक्षका क्याप्टेनले गर्नेछन् । सैन्य अभ्यास नेपालसँग कूटनीतिक सम्बन्ध राख्ने देशको साझा व्यवहार, अनुभव, कौशल र व्यावसायिक सूचना बाँड्नका लागि नियमित द्विपक्षीय एवं
बहुपक्षीय सैन्य अभ्यासको हिस्सा हो ।’

यही शृंखलाको अघिल्लो अभ्यास अप्रिलमा नेपालमा भएको थियो । 

नेपाली सेनाका प्रवक्ता ब्रिगेडियर गोकुल भण्डारीले यो सैन्य अभ्यास चक्रीय आधारमा सञ्चालन गरिने बताए । दुवै पक्षबाट १५–१५ सैनिक अभ्यासमा भाग लिने उनले बताए । उनीहरूको संख्या बढ्न पनि सक्छ ।

एजेन्सी