काठमाडौं– सरकारले मलेसिया जान जेठ दुई गतेसम्म प्रक्रिया पूरा भएका कामदारको श्रमस्वीकृति दिने निर्णय गरेको छ ।

श्रम, रोजगार तथा सामाजिक सुरक्षा मन्त्रालयले आइतबार विज्ञप्ति जारी गर्दै  २०७५ जेठ २ गतेससम्ममा भिषा स्ट्याम्पिङ् भई अन्तिम श्रम स्वीकृति बाँकी रहेका श्रमिकलाई अन्तिम श्रम स्वीकृति दिने जनाइएको छ ।

 मन्त्रालयको यो निर्णयसँगै गत जेठ २ गतेसम्म मलेसियामा रोजगारीका लागि  भिषा लागिसकेका कामदारलाई मलेसिया जान खुल्ला  भएको छ ।

मन्त्रालयले जारी गरेको विज्ञप्तिमा मलेसिया जाने श्रमिकमाथि अनुचित असुली गरी विगतमा भएको ठगी अन्त्य गरी सहज प्रक्रियाबाट रोजगारीमा जाने व्यवस्था मिलाउन मन्त्रालय गम्भीर रहेको बताइएको छ ।

वैदेशिक रोजगारीका क्षेत्रमा कार्यगर्ने केही संस्थाहरुले मलेसिया जाने श्रमिकहरुबाट गैरकानूनी रुपमा शूल्क उठाउँदै ठगी गर्ने गरेको भेटिएपछि मन्त्रालयले गत जेठ दुई गतेबाट  श्रमिकबाट अनुचित र गैकानूनी रुपमा अतिरिक्त शुल्क लिने कार्य बन्द गराइ गैरकानूनी तथा अनुचित कार्य गर्ने संस्थाको कामप्रति रोक लगाइएको थियो ।

मन्त्रालयले एकपक्षीय रुपमा खडा गरिएका ३९ स्वास्थ्य संस्थाहरुको सिन्डिकेट अन्त्य गरी मापदण्ड पूरा गरी मन्त्रालयमा सूचीकृत भएका स्वास्थ्य संस्थाहरुबाट स्वास्थ्य परीक्षण गर्न पाउने व्यवस्था मिलाउने निर्णय  समेत गरेको थियो ।

यस्तै गैरकानूनी कार्य गर्ने संस्थाहरुको नेपाल प्रहरीबाट अनुसन्धान भई ३४ संस्थाका ४४ जना व्यक्तिहरुमाथि  ३ अर्व १० करोड ५५ लाख बराबरको बिगो दाबी सहित अदालतमा मुद्दा दायर भई न्यायिक निरुपणको प्रकृयामा रहेको जनाएको छ ।