काठमाडौं – चीनले श्रीलंकामा आफ्नो प्रभाव थप बढाउनका लागि २९.५ करोड डलर ऋण दिने घोषणा गरेको छ ।

श्रीलंकाका राष्ट्रपति मैत्रीपाला सिरिसेनाले आफ्नो निर्वाचन क्षेत्र पोलरुवामा चिनियाँ लगानीमा बन्ने मिर्गौला अस्पतालको आधारशिला राख्ने समारोहमा यसको घोषणा गरे । श्रीलंका पनि चीनको बेल्ट एन्ड रोड पहलमा जोडिएको छ । 

समारोहमा सिरिसेनाले भने, ‘चिनियाँ राजदूतले बताएअनुसार यो चिनियाँ राष्ट्रपति शी चिनफिङका तर्फबाट उपहार हो ।’

सिरिसेनाले भने, ‘उनले मलाई २९.५ करोड डलर उपहारमा दिए र त्यसको प्रयोग कुनै पनि परियोजनाका लागि खर्च गर्न सक्छु । म चिनियाँ राजदूतलाई देशका सबै चुनावी क्षेत्रमा घर बनाउने एउटा परियोजना प्रस्ताव सुम्पिँदैछु ।’

आफ्नो कार्यकालको शुरूआतमा सिरिसेनाले राजपक्षेको कार्यकालमा शुरू भएको चिनियाँ लगानीमा बनेका कैयौं भौतिक निर्माण परियोजनालाई रद्द गरिदिएका थिए । यी परियोजनामा भ्रष्टाचार र सरकारी प्रक्रियालाई मिचिएको आरोप थियो
। तर एक वर्षपछि नै सिरिसेना सरकारले केही परिवर्तनका साथ चिनियाँ परियोजना फेरि शुरू गर्न स्वीकृति दियो । 

श्रीलंकाले २६ वर्षसम्म गृहयुद्धको सामना गर्नुपरेको थियो । सन् २००९ मा गृहयुद्ध अन्त्य भएपछि श्रीलंकाको पुनर्निर्माणका लागि सबभन्दा अगाडि चीन आएको थियो । 

चीनले श्रीलंकामा लगातार प्रभाव जमाउँदै जाँदा भारत तनावमा परेको छ । चीनले श्रीलंकाको हम्बनटोटा बन्दरगाहमा नियन्त्रण लिएकाले भारतको चिन्ता बढेको हो ।

एजेन्सी