काठमाडौं– नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले डा. गोविन्द केसीलाई प्रयोग गरेर सरकारविरुद्ध प्रतिक्रान्तिको खतरा बढेको बताएका छन् । उनले डा.केसीप्रति आफूहरुको कुनै घृणा नभएको र वार्ता मार्फत समस्या समाधान गर्न सकिने बताए ।

कम्युनिष्ट पार्टीका संस्थापक पृष्पलाल श्रेष्ठको ४० औ स्मृति दिवसको अवसरमा नेकपाले काठमाडौंको राष्ट्रिय सभागृहमा आयोजित कार्यक्रमलाई सम्वोधन गर्दै प्रचण्डले डा. केसीको नाममा राजनीति शुरु भएको आरोप लगाएका हुन् । 

‘डा केसी तपाइँ कसैको घेरामा पर्नु भएको छ कि हेर्नुहोला ?’ प्रचण्डले भने, ‘तपाइप्रति हाम्रो कुनै घृणा छैन, लेनदेन गरेर समस्या समाधान गर्न सकिन्छ । तर सरकारी टोलीसँग वार्ता गर्दैनौं भन्ने यो हो लोकतन्त्र ?’ 

प्रचण्डले अनसनकारीको फेरो समातेर प्रमुख प्रतिपक्षी दल नेपाली कांग्रेसले बैतरणी तर्न खोजेको आरोप लगाए । ‘हामीले संसदको पहिलो दिनको बैठकमा भनेका थियौं, सत्ता पक्ष र प्रतिपक्ष एक भएर देशमा समृद्धिको अभियान शुरु गर्नु पर्छ । तर चार महिना कुर्ने धैर्यता देखिएको छैन, फेरि अराजकता, फेरि तोडफोड ?’ प्रचण्डले प्रश्न गरे । 

प्रचण्डले कांग्रेसको प्रबृत्तिप्रति लक्षित गर्दै भगवान शिव पार्वतीको किस्सा सुनाए । 

‘महादेव र पार्वती आकाश मार्गमा हिँडिरहेको बेलामा तल जमिनमा सुगुरका पाठाहरु फोहोरको नालीमा खेलिरहेका रहेछन् । सुगुरका पाठाहरु नालीमा खेलेको देखेर पार्वतीले फोहोरमा रहेको सुगुरका पाठालाई राम्रो ठाउँमा लैजान आग्रह गरिछन् । महादेवले उनीहरु त्यही रमाउँछन भनेछन् । (श्रीमतिले जिद्दी गरेपछि केही लाग्दैन ।) महालेव तल ओर्लेर सुगुरका पाठालाई भनेछन्– अव तिमीहरु स्वर्गमा जाने उतै खेल्ने रमाउने । सुगुरका पाठाले प्रश्न गरेछन्– माथि स्वर्गमा यस्तो छ कि छैन ? यस्तो प्रश्न सुनेपछि महादेव फर्केछन् । 

यो किस्सा सुनाएर प्रचण्डले सफा राजनीति गरौ भन्दा अराजकता फैलाउनेहरुले प्रतिक्रान्ति गर्न खोजेको आरोप लगाए । 

‘विचरा अनसन बसेको डाक्टरको फेरो समातेर वैतरणी तर्न खोज्दैछ कांग्रेस’ प्रचण्डले भने, ‘डा. केसी तपाइँ कसै कसैको घेरामा पर्नु भएको छ हेर्नुहोला । तपाइँप्रति हाम्रो कुनै घृणा छैन,गरेर समाधान गनै सकिन्छ ।’