काठमाडौं – प्रधानमन्त्री केपी शर्मा ओलीले सरकारी राजस्वबाट तलब लिने डाक्टरहरूले राजनीतिक स्वार्थका लागि बिरामीको उपचार गर्दिन भन्न नमिल्ने बताउनुभएको छ ।

नेपाल कम्युनिस्ट पार्टीका संस्थापक महासचिव पुष्पलाल श्रेष्ठको ४०औं स्मृति दिवशका अवसरमा नेकपाले राष्ट्रिय सभागृहमा सोमबार आयोजना गरेको कार्यक्रममा बोल्दै प्रधानमन्त्री ओलीले सो कुरा बताउनुभएको हो ।

'राजनीतिक स्वार्थका लागि बिरामीको उपचार गर्न दिन्न भन्न पाइन्छ ?,' प्रधानमन्त्री ओलीले भन्नुभयो– 'यो गैरकानूनी हो । अमानवीय हो । डाक्टरले अस्पताल आएर बिरामीको उपचार गर्दिन भन्न पाइन्न ।'

प्रधानमन्त्री ओलीले अनशन आफैंमा मानव अधिकारविरोधी कुरा भएको बताउनुभयो ।

'अनशन मानव अधिकारविरोधी कुरा हो । मानव अधिकारको परिभाषामा अनशन पर्दैन । आफैंलाई प्रताडन दिनु मानवअधिकार होइन,' ओलीले भन्नुभयो ।

साथै उहाँले डाक्टर केसीले सरकारसँग वार्ता गर्न नखोजेको पनि बताउनुभयो ।

'आफैं जानु'भा हो कि अरुले लग्या हो, जुम्ला गएर अनशन बस्नु'भो,' प्रधानमन्त्रीले भन्नुभयो– 'राम्रो स्वास्थ्य उपचारका लागि हामीले राजधानी ल्यायौं । वार्ता समिति बनेको छ, तर उहाँ वार्ता गर्दिन भन्नुहुन्छ ।'

प्रधानमन्त्री ओलीले स्वास्थ्य शिक्षामा सुधारका लागि तर्कपूर्ण बहसमा आउन डाक्टर केसीलाई चुनौती समेत दिनुभयो ।

'स्वास्थ्य शिक्षामा कस्तो सुधार गर्नुपर्छ, आउनुस् तर्कपूर्ण कुरा गरौं,' प्रधामन्त्री ओलीले भन्नुभयो- 'तपाईं नै जिम्मा लिनुस् । आयोग बनाएर हामी तपाईंलाई नै जिम्मा लगाइदिन्छौं ।'

डाक्टर केसीले चिकित्सा क्षेत्रमा सुधारभन्दा पनि समस्या खडा गर्न खोजेको प्रधानमन्त्रीको आरोप छ ।

प्रधानमन्त्री ओलीले डा. केसीले सरकारलाई स्वास्थ्य चेकजाँच गर्नसमेत नदिएको बताउनुभयो ।

'ब्लड टेस्ट गरे के बिग्रिन्छ भनेर आत्तिनु'भा ? आफू-आफू त गरिराख्नुभाछ । अरु डाक्टरलाई छेउमै जान नदिने, ब्लड प्रेसर नाप्न पाइँदैन भन्ने, रगत जाँच्न पाइँदैन भन्ने, गर्न खोज्या के ?' प्रधानमन्त्रीको प्रश्न छ– 'कतिपयले सत्याग्रह भन्या सुन्छु, कस्तो सत्याग्रह हो यो, मुड्की बटारेर सत्याग्रह हुन्छ ?'

प्रधानमन्त्री ओलीले गैरकानूनी र अमानवीय त्यान्द्रो समातेर राजनीति नगर्न कांग्रेसलाई सुझाव दिनुभयो ।

'संसदमा विरोधको सूचना दर्ता गर्ने अनि बहसमा भाग लिन्न भन्ने ?' कांग्रेसलाई लक्षित गर्दै ओलीले भन्नुभयो- 'आउनुस्, बहस गरौं । हामी जनताको पक्षमा बहस गर्न र विधेयक संशोधन गर्न तयार छौं ।'