बुटवल – ५ नम्बर प्रदेशका मुख्यमन्त्री शंकर पोखरेल नेपाली कांग्रेस र डा. गोविन्द केसीको आन्दोलन सरकारलाई असफल बनाउनमा केन्द्रित रहेको टिप्पणी गरेका छन् । 

उनले डा. केसीको आन्दोलन गलत उद्देश्यले प्रेरित भएको र कांग्रेसले केसीका मुद्दालाई साथ दिन नभई सरकारलाई असफल बनाउन आन्दोलन गरेको दाबी गरे । अहिलेको सरकार बन्दा शुरूमा मौन रहेको कांग्रेस एमाले र माओवादीबीच पार्टीबीच एकता भएपछि अब ५ वर्ष कुनै हालतमा सरकारमा पुग्न सकिँदैन भन्ने भएपछि अत्तालिएको बताए ।

नेपाल कम्यूनिस्ट पार्टीका सस्थापक पुष्पलाल श्रेष्ठको ४० औं स्मृति दिवसका अवसरमा पार्टीको रुपन्देही क्षेत्र नम्बर २ ले सोमबार बिहान बुटवलमा आयोजना गरेको स्मृति सभामा बोल्दै मुख्यमन्त्री पोखरेलले भने, ‘विगतमा कांग्रेसकै नीतिका कारण शिक्षा स्वास्थ्यमा निजी क्षेत्रको लगानी भएकाले अहिले त्यही ठीक हो भन्ने लागे कांग्रेसले हाम्रो नीति गलत थियो भनेर आत्मालोचना गर्नुपर्छ,’ मुख्यमन्त्री पोखरेलले भने ।

उनले थपे, ‘विगतमा शिक्षा स्वास्थ्यमा लगानी गराउन उत्प्रेरित गर्ने अहिले सडकमा आन्दोलन गर्ने यस्तो गर्न मिल्दैन, हाम्रा नीतिले यस्तो भयो भनेर आत्मालोचना गर्नुपर्छ ।’ डा. केसीको काठमाडौंमा अब मेडिकल खोल्नु हुँदैन भन्ने माग मनमोहन कलेजविरुद्ध भएको उल्लेख गर्दै उनले भने, ‘नेताहरूको नामलाई कस्तो ठाउँमा प्रयोग गर्ने हामीले छलफल गर्न सक्छौं, मनमोहन नआउँदासम्म नबोल्नेले अहिले सडकमा ताण्डप देखाइरहेका छन्, त्यो कत्ति पनि जायज छैन ।’

उद्देश्य गलत भएपनि जनमानसमा डा. केसीले उठाएका माग पवित्र छन् भन्ने जनमानसमा परिसकेको उनले बताए । मुख्यमन्त्री पोखरेलले शिक्षा र स्वास्थ्य क्षेत्रको सुधारका लागि यी २ क्षेत्रको लगानीलाई नाफारहित बनाउनुपर्ने बताए ।

नेकपाका नेता समेत रहेका पोखरेलले स्वगीर्य पुष्पलालले देखाएको बाटोमा अहिलेको नेपाल कम्यूनिस्ट पार्टी (नेकपा) अघि बढिरहेको बताउँदै सरकार बनाउने ठूलो होइन, समाज बदल्ने महत्वपूर्ण हो भन्ने पुष्पलालको कुरालाई अहिलेको सरकारले विशेष प्राथमिकता दिएको बताए ।

उनले भने, ‘सरकार बनाउने होइन समाज बदल्ने ठूलो कुरा हो पुष्पलालले भन्नुहुन्थ्यो, अहिलेको सरकार त्यही समाज बदल्ने अभियानमा छ ।’ मुख्यमन्त्री पोखरेलले सरकारको अभियानलाई सार्थक बनाउन र ३ वर्षभित्र जनताले अनुभूति गर्ने गरी परिवर्तन गर्न पार्टी संगठन र कार्यकर्ता विकास र समृद्धिको अभियानमा जुट्नुपर्ने बताए । उनले सरकारले समाज सुधार र परिवर्तनका काम अघि सारेपछी सरकारमाथि अहिले चौतर्फी प्रहार भइरहेको बताए ।

मुख्यमन्त्री पोखरेलले यातायात क्षेत्रको सिण्डीकेट, काम नगर्ने ठेकेदार माथिको कारवाही, वैदेशिक रोजगारीमा पठाउने एकलौटीको अन्त्य, गैरसरकारी संघसंस्था र दाताबाट आउने रकमको व्यवस्थापन लगायतका क्षेत्रमा सरकारले सुधार ल्याउन खोजेकाले चौतर्फी प्रहार भएको बताए ।

उनले संवैधानिक शक्ति भएकाले होइन, विगतदेखि खाइपाई आएकाले अदृष्य पैसाको बलमा अहिले सरकारमाथि प्रहार गरिरहेको बताए  । नेकपाको प्रदेश कार्यालय सुख्खानगरमा तेजेन्द्र केसीको अध्यक्षता र बाबुराम पन्थीको सञ्चालनमा स्मृतिसभा भएको थियो ।