बुटवल – रुपन्देहीको तिलोत्तमा नगरपालिका प्रमुख बासुदेव घिमिरेले आफ्नो पारिश्रमिक बापतको रकमबाट सामुदायिक विद्यालयका विद्यार्थीलाई छात्रवृत्ति वितरण गरेका छन् ।

नगरका सामुदायिक विद्यालयमा अध्ययन गर्ने ४४ जना विद्यार्थीलाई सम्बन्धित विद्यालयको सिफारिसको आधारमा उनले छात्रवृत्ति प्रदान गरेका हुन् । नगर प्रमुख घिमिरेले यसअघि नै आफूले प्राप्त गर्ने सम्पूर्ण पारिश्रमिक रकमबाट सामुदायिक विद्यालयमा अध्ययनरत गरीब तथा जेहेन्दार विद्यार्थीलाई छात्रवृत्ति प्रदान गर्ने घोषणा गरेका थिए ।

घोषणाअनुसार उनले १ वर्षको पारिश्रमिक स्वरुप प्राप्त गरेको ३ लाख ८५ हजार रूपैयाँ एक समारोहबीच तिलोत्तमा नगर प्रमुख छात्रवृत्ति कोष–२०७५ मार्फत् वितरण गरेका हुन् । छात्रवृत्ति नगरका सम्पूर्ण सामुदायिक विद्यालयका १/१ जना विद्यार्थीले प्राप्त गरेका हुन् ।

छात्रवृत्ति वितरण तथा व्यवस्थापनका लागि नगरपालिकाले उपप्रमुख जागेश्वरी चौधरीको संयोजकत्वमा समिति गठन गरेको छ । सोही समितिको सिफारिसका आधारमा कक्षा १ र २ मा अध्ययनरत विद्यार्थीलाई  ६ हजार, कक्षा ३ र ४ का लागि ७ हजार, ५ र ६ को लागि ८ हजार, ७ र ८ को लागि ९ हजार, कक्षा ९ को लागि ९ हजार ५ सय, कक्षा १० को लागि १० हजार र कक्षा ११ को लागि १७ हजार रूपैयाँ वितरण गरिएको छ ।

कार्यक्रममा बोल्दै नगर प्रमुख घिमिरेले सामुदायिक विद्यालयको शैक्षिक गुणस्तर सुधार गर्न र गरीब तथा जेहेन्दार विद्यार्थीलाई उत्साही बनाउन आफूले प्राप्त गर्ने पारिश्रमिक छात्रवृत्तिमा लगाउने निर्णय गरेको बताए । आफूले बाँकी ४ वर्षको पारिश्रमिक पनि छात्रवृत्तिमै लगाउने बताए ।

यो वर्षलाई शैक्षिक सुधार वर्षको रुपमा लिएको तिलोत्तमा नगरपालिकाले आउँदो ३ वर्षभित्र नगरका सबै सामुदायिक विद्यालयलाई संस्थागत विद्यालयका स्तरमा पु¥याउने लक्ष्य लिएको छ । यहीँ लक्ष्यअनुसार नगरपालिकाले बालविकास कक्षामा अध्ययन गर्ने विद्यार्थीहरूलाई दिवा खाजा दिने अभियान सुरू गरेको छ । ५ कक्षासम्मका विद्यार्थीलाई घरबाट खाजा ल्याउन ‘टिफिनकारी’ समेत वितरण गरेको छ ।

चालू आर्थिक वर्षमा सबैभन्दा बढी बजेट शिक्षा क्षेत्रमा विनियोजन गरेको तिलोत्तमाले सामुदायिक विद्यालयको शैक्षिक तथा भौतिक गुणस्तर सुधारका लागि विभिन्न कार्यक्रम अघि सारेको छ । 

छात्रवृत्ति वितरण कार्यक्रममा बोल्दै नेपाली कांग्रेसका नगर सभापति हरिलाल पाण्डे, नगरपालिकाका प्रशासकीय अधिकृत कृष्ण प्रसाद सापकोटा, शिक्षा प्रमुख तथा उपसचिव हरि ज्ञवाली, तिलोत्तमा व्यापार संघका अध्यक्ष जेपी कडेल, पत्रकार डायलसन अधिकारी र ईन्दिरा अर्याल, शान्ति नुमना माविका प्रअ कुलप्रसाद लामिछाने, अभिभावक नारायण ज्ञवाली लगायतले नगरप्रमुख घिमिरेले पारिश्रमिक बापतको रकम गरीब तथा जेहेन्दार विद्यार्थीको शिक्षामा खर्च गरेकोमा प्रशंसा गरे ।