काठमाडौं – एनआईसी एसिया क्यापिटल लिमिटेडले सेवाग्राहीलाई उत्कृष्ट सेवा दिने उद्देश्यले सन्ध्याकालीन काउन्टर सञ्चालनमा ल्याएको छ ।

सन्ध्याकालीन काउन्टरमार्फत् सेवाग्राहीले दैनिक कार्यालय समयभन्दा अतिरिक्त समय सेवा प्राप्त गर्न सक्ने प्रमुख कार्यकारी अधिकृत (सीईओ) झनकराज ढुङ्गेलले बताए । उनका अनुसार एनआईसी एसिया क्यापिटलको बबरमहल काठमाडौंस्थित कार्यालयमा आइतवारदेखि बिहीवारसम्म बिहान १० बजेदेखि दिउँसो ३ बजेसम्म तथा सन्ध्याकालीन काउन्टर दिउँसो ४ बजेदेखि बेलुका ६ बजेसम्म र शुक्रवार बिहान १० बजेदेखि दिउँसो १ बजेसम्म तथा सन्ध्याकालीन काउन्टर दिउँसो २ बजेदेखि बेलुका ५ बजेसम्म लागू हुने गरी सञ्चालनमा ल्याएको छ । 

सेवामार्फत् खाता खोल्ने आवेदन फाराम संकलन, शेयर प्रमाणपत्र तथा लाभांश विवरण, शेयर अभौतिकरण गर्ने, लगानी व्यवस्थापन तथा परामर्श सेवा लगायतका सेवा उपलब्ध हुने सीईओ ढुङ्गेलले बताए । 

‘सेवाग्राहीको व्यस्ततालाई मध्यनजर राख्दै सेवा सञ्चालनमा ल्याइएको हो,’ सीईओ ढुङ्गेलले भने, ‘सेवाले कामकाजी सेवाग्राही तथा व्यस्त समयमा सेवा लिन असुविधा हुने सेवाग्राहीलाई विशेष उपयोगी हुनेछ ।’

गुणस्तरीय, किफायती र शीघ्र सेवा प्रदान गर्ने एनआईसी एसिया क्यापिटलको प्रतिबद्धता रहेको छ । सेवाग्राहीसँग सामिप्यता बढाउन सन्ध्याकालीन काउन्टरले महत्वपूर्ण भूमिका खेल्ने विश्वास लिइएको छ । बैंकले हाल शेयर रजिस्ट्रार, निक्षेप सदस्य, निष्काशन तथा बिक्री प्रबन्धक, प्रत्याभूतिकर्ता, लगानी व्यवस्थापन, परामर्श सेवा, म्युचुअल फण्ड लगायत सेवा प्रदान गरिरहेको छ ।