बुटवल – रूपन्देहीको तिलोत्तमा–२ योगिकुटीस्थित तिलोत्तमा क्याम्पसमा वातावरणीय विज्ञान विषयमा पढाइ हुने भएको छ ।

क्याम्पसले उपत्यका बाहिर पहिलो पटक बुटवलमा ‘बीएसी इन्भाइरमन्ट साइन्स’ विषय भित्र्याएर पठनपाठनको तयारी थालेको हो । मोफसलमा विज्ञान र बीबीए विषयको पढाइमा अब्बल सावित क्याम्पसले विद्यार्थीको रोजाइमा पर्न सफल नयाँ विषय थप गरी यसै शैक्षिक शत्र (२०७५) देखि पढाइ शुरू गर्ने क्याम्पसले जानकारी गरायो ।

क्याम्पसका अध्यक्ष रामचन्द्र ढकालले पछिल्लो समय विद्यार्थीको रोजाइमा र वातावरणीय क्षेत्रमा आवश्यक दक्ष जनशक्ति उत्पादन गर्न आफूहरू ५ नम्बर प्रदेशमा नयाँ विषय ल्याएको बताए । 

‘सडक, भौतिक संरचनाहरू बनाउनका लागि राज्यले हरेक स्थानीय तहमा १ जना अनिवार्य वातावरणीय विज्ञ राख्ने नीति लिएको छ,’ अध्यक्ष ढकालले भने, ‘यही आवश्यकतालाई पूर्ति गर्न क्याम्पसले वातावरणीय विज्ञान विषय भित्र्याएको हो ।’ क्याम्पस २०५३ सालमा स्थापना भएको थियो । उक्त विषयका लागि क्याम्पसले फाराम वितरण गरेको छ । क्याम्पसले ४८ जना विद्यार्थीको मात्र सिट छ ।

४ वर्षे कोर्स रहेको वातावरणीय विज्ञानमा ८ सेमेस्टर हुन्छन् । ४ वर्षको लागि उक्त विषय पढ्न ५ लाख रूपैयाँ खर्च लाग्ने क्याम्पसका संस्थापक प्राचार्य रामचन्द्र आचार्यले जानकारी दिए । १२ कक्षामा मूल विषय विज्ञान विषय लिई सबै विषयमा ‘सी’ ग्रेड अनिवार्य ल्याएको विद्यार्थीले मात्र फाराम भर्न पाउने संस्थापक प्राचार्य आचार्यको भनाइ छ ।

वातावरणीय समस्याको समाधान नभएसम्म मानव जीवन सुरक्षित हुँदैन । त्यसैले यो विषयको माग बढ्दो छ ।