सुनसान छ निशान पढ्ने स्कूल : त्रासमा साथीहरू, भन्छन्– कहिल्यै झगडा गर्दैनथ्यो [भिडियोसहित]

साउन २२, २०७५

काठमाडौं –मंगलबार बिहानको ११ बजे ।

स्थान– हाइल्यान्ड स्कूल पुरानो सिनामंगल । अन्य दिन चहलपहल हुने यस स्कूलमा मंगलबार सन्नाटा थियो ।

केही शिक्षक र विद्यार्थी त थिए, तर सबै शोकमा ।

यही स्कूलमा कक्षा ६ मा अध्ययनरत ११ वर्षीय बालक निशान खड्काको अपहरण र हत्याको शोकमा विद्यालय विदा भयो ।

बिहान १० बजे विद्यालय परिवारले निशानको फोटोमा पुष्प गुच्छा चढाएर श्राद्धाञ्जली दिए । त्यसपछि अधिकांश घर फर्किए ।

विद्यालय परिसरमै बाँकी रहेका विद्यार्थीहरू त्रसित देखिन्थे ।

स्कूल विदा भएपनि ‘क्लास टिचर’ जानकी जोशी स्कूल परिसरमै भेटिइन् । ‘निशान ज्ञानी विद्यार्थी थियो । जहिले पनि होमवर्क गरेर आउँथ्यो,’ दुःखी हुँदै जोशीले भनिन्, ‘उसको हत्या भयो भन्ने कुरा अहिले पनि पत्यार लागेको छैन ।’

स्कूलबाहिर निशानसँगै पढ्ने दुई साथी पनि भेटिए– दीप श्रेष्ठ र प्रदीप थापा । प्रदीप निशानका सबैभन्दा नजिकका साथी रहेछन् । उनीहरू सँगसँगै स्कुल जाने आउने गर्थे ।

निशानको हत्याले प्रदीपलाई निकै ठूलो चोट परेको छ । उनी एक्लो महसुस गरिरहेका छन् । निशानलाई सम्झिँदै उनी भन्छन्– ‘त्यो कुरा थाहा पाए पछि म रोएँ ।’

प्रदीपले भावुक हुँदै थपे– ‘निशान मेरो मिल्ने साथी थियो । हामी सँगै कक्षामा बस्ने, खाजा खाने, खेल्ने र होमवर्क गर्ने गर्थ्यौं । ऊ कहिले पनि झगडा गर्दैनथ्यो ।’

निशानको अाइतबार बेलुका अपहरणपछि हत्या भएको थियो । उनको शव सोमवार बिहान भक्तपुरमा गाडिएको अवस्थामा फेला परेको थियो ।

उनको अपहरण र हत्यामा संलग्न रहेको आरोप लागेका दुई जना प्रहरी कारवाहीमा मारिएका छन् ।

नुवाकोटका अजय तामाङ र सिन्धुपाल्चोकका गोपाल तामाङको सोमबार नै प्रहरी इन्काउन्टरमा मृत्यु भएको हो ।

निशानकी आमा चमेली खड्का काँडाघारीमा चिया खाजा पाइने सानो होटल चलाउँछिन् । बुवा वैदेशिक रोजगारीको शिलशीलामा मलेसियामा छन् ।

निशानको अपहरण र हत्यापछि उनको परिवार र विद्यालय मात्र होइन देशैभर शोक छाएको छ ।

निशानबारे के भन्छन् शिक्षिका र उनका साथीहरू, हेर्नुहोस्  भिडियो :

साउन २२, २०७५ मा प्रकाशित

गगन अर्याल

अर्याल लोकान्तरका फोटो पत्रकार हुन् ।

लेखकबाट थप...

प्रतिक्रिया दिनुहोस

ताजा समाचार