नागरिकता ऐन संशोधनको तयारी, उमेरमा त्रुटि भए सच्याउन पाइने

साउन २४, २०७५

काठमाडौं– नागरिकतामा रहेको त्रुटि सच्चाउन मिल्ने गरी नागरिकता ऐन संशोधनको तयारी भएको छ । राज्यको उच्च ओहोदामा पुगेका व्यक्तिको नागरिकता र उमेरसम्बन्धी विवाद आइरहँदा सरकारले तोकिएको समयभित्र उमेरको त्रुटि सच्याउन मिल्नेगरी नागरिकता ऐन संशोधन प्रस्ताव दर्ता गरेको छ । 

शुरुमा नागरिकता प्रमाणपत्र जारी भएको एक वर्षभित्र उमेरको त्रुटि सच्याउन मिल्ने व्यवस्था प्रस्तावित विधेयकमा गरिएको छ । संशोधन विधेयक सरकारका तर्फबाट उपप्रधान एवं रक्षामन्त्री ईश्वर पोखरेलले दर्ता गरेका हुन् । 

विधेयकले नागरिकता प्रमाणपत्रमा उल्लेखित थर वा शैक्षिक योग्यताको प्रमाणपत्र अनुसार प्रमाणपत्रमा त्रुटि हुन गएमा सच्याउन पाउने व्यवस्था प्रस्तावित नागरिकता ऐन संशोधन विधेयकले गरेको छ । उमेर विवादमा भने प्रमाणपत्र जारी भएको एक वर्षभित्र सच्याउन निवेदन दिनुपर्नेछ । 

मूल ऐनको दफा १७ को उपदफा १ मा खण्ड थप गर्दै सरकारले प्रमाणपत्र जारी भएको एक वर्षभित्र निवेदन दिन सक्ने व्यवस्था गरेको छ । प्रस्तावित विधेयकमा भनिएको छ ‘उमेर सच्याउन चाहने व्यक्तिले नागरिकताको प्रमाणपत्र जारी भएको मितिले एक वर्षभित्र सम्बन्धित अधिकारीसमक्ष निवेदन दिनुपर्ने छ ।’
 

साउन २४, २०७५ मा प्रकाशित

प्रतिक्रिया दिनुहोस

ताजा समाचार