थाइल्यान्डमा बन्दैछ भव्य राम मन्दिर

साउन २४, २०७५

काठमाडौं – थाइल्यान्डको अयुथ्यामा भव्य राम मन्दिर निर्माण शुरू गरिएको छ । 

राम जन्मभूमि निर्माण न्यास ट्रस्टका अध्यक्ष महन्त जनमेजय शरणले बताएअनुसार, भारतको अयोध्यामा राम मन्दिर निर्माण विवादित भइरहँदा रामभक्तहरूले थाइल्यान्डमा मन्दिर निर्माण थालेका हुन् । 

बुधवार अयुथ्यामा राम जन्मभूमि निर्माण ट्रस्टले भूमि पूजन र धार्मिक अनुष्ठान गरेपछि राम मन्दिर निर्माण शुरू भयो । 

बैंककमा राम मन्दिरको निर्माण भएपछि भगवान् रामको विचारधारा भारतबाहिर पनि प्रचारप्रसार हुने अध्यक्षले बताए । राम मन्दिर चाव फ्राया नदीको किनारमा हुनेछ र यो शहरको केन्द्र भागमा छ । 

दक्षिणपूर्वी एसियाको बौद्धबहुल देश थाइल्यान्डमा हिन्दू धर्मप्रति आस्था देख्न पाइन्छ । थाइल्यान्डका मानिस हिन्दू मन्दिर र देवतामा गहिरो आस्था राख्छन् र आफ्ना राजालाई पनि रामको वंशज मान्छन् । 

थाइ संस्कृति एवं साहित्यमा रामायण र मर्यादापुरुषोत्तम रामको चर्चा छ । त्यहाँका राजाहरू पहिलेदेखि नै आफ्नो नाममा राम जोड्थे । 

अठारौं शताब्दीमा बर्माका सैनिकहरूले शहर कब्जा गरेपछि नयाँ शासकको उदय भयो । उनले आफूलाई राम प्रथम भने र एक शहर स्थापना गरे । त्यसैलाई बैंकक पनि चिनिन्छ । 

तिनै राजाले राम कियेन लेखे जसलाई स्थानीय भाषामा रामायण भनिन्छ । उनले यसलाई राष्ट्रिय महाकाव्यको दर्जा दिए । 

थाइल्यान्डमा राम कियेनमा आधारित नाटक र कठपुतली प्रदर्शन धार्मिक कार्य मानिन्छ । 

राम कियेनमा फ्र राम, फ्र लक (लक्ष्मण), पाली (बाली), सुक्रीप (सुग्रीव), ओन्कोट (अंगद), खोम्पुन (जाम्बवन्त), बिपेक (विभीषण), तोतस कन (दशकण्ठ रावण), सदायु (जटायु), सुपन मच्छा (शूर्पणखा) जस्ता चरित्र भेटिन्छन् ।
थाइल्यान्डमा हिन्दू देवीदेवता र उनीहरूसँग जोडिएका प्रतीक अनेकौं ठाउँमा भेटिन्छन् । थाइल्यान्डको राष्ट्रिय चिह्न नै गरुड हो । राजधानी बैंककको विमानस्थलको स्वागत हलभित्र समुद्र मन्थनको भव्य दृश्य छ ।

एजेन्सी
 


ADVERTISEMENT

साउन २४, २०७५ मा प्रकाशित

प्रतिक्रिया दिनुहोस