‘अपहरणकारी’को इन्काउन्टरबारे गृहमन्त्रीको चासो, आईजीपीले भने- भिडन्त भएकै हो

फाइल फोटो
साउन २४, २०७५

काठमाडौं – गत आइतवार साँझ काठमाडौंको काँडाघारीबाट अपहरण गरी भक्तपुरको सानोठिमीमा हत्या गरिएका बालकका ‘अपहरणकारी’लाई इन्काउन्टरमा मारिएको विषयमा गृहमन्त्री रामबहादुर थापाले चासो व्यक्त गरेका छन् ।

गृहमन्त्री थापा ‘मानव तस्करी, बेचविखन र अन्तरदेशीय अपराधसम्बन्धी अन्तर्राष्ट्रिय सम्मेलन’मा सहभागी हुन इन्डोनेसियाको गएकै दिन आइतवार काठमाडौंका काँडाघारीबाट बालकको अपहरण भएको थियो । 


ADVERTISEMENT

सोमवार मृत फेला परेका ११ वर्षीय निशान खड्काको अपहरणमा संलग्न रहेको भन्दै प्रहरीले सोमवार सिन्धुपाल्चोकका गोपाल तामाङ र नुवाकोटका अजय तामाङलाई ‘दोहोरो भिडन्त’का क्रममा गोली हानी मारेको थियो ।

सम्मेलनमा सहभागी भएर बुधवार स्वदेश फर्किएका गृहमन्त्री थापाले बिहीवार मध्याह्न प्रहरी महानिरीक्षक सर्वेन्द्र खनालसहित घटनासँग सम्बन्धित प्रहरी अधिकारीलाई बोलाएर बालकको अपहरण र अपहरणमा संलग्न भनिएका व्यक्तिलाई मारिएको घटनाबारे जानकारी लिएका हुन् ।

गृहमन्त्री थापाले अपहरित बालकको सकुशल उद्दार गर्न नसक्नुका कारण र अपहरणकारी भनिएका व्यक्तिलाई के–कति कारणले गोली हानिएको हो भन्ने विषयमा प्रहरी महानिरीक्षसहित प्रहरी अधिकारीको जवाफ मागेका थिए । 

जवाफमा प्रहरी महानिरीक्षक सर्वेन्द्र खनालले अपहरणकारीले बच्चाको हत्या गरेर भागेको खोजी गर्ने क्रममा भक्तपुर सूर्यविनायकको जंगलमा फेला पर्दा दोहरो भिडन्त भएको बताएका छन् । 

अपहरणकारी भनिएका व्यक्तिलाई नियन्त्रणमा लिएर गोली हानी मारिएको भन्ने विषय सञ्चारमाध्यममा आएपछि गृहमन्त्री थापाले प्रहरी अधिकारीलाई बोलाएर सो सम्बन्धमा जानकारी लिएका हुन् ।

इन्काउन्टरमा मारिएका गोपाल र अजयको गैरन्यायिक हत्या भएको भन्दै उनीहरूका आफन्तले बुधवार राष्ट्रिय मानव अधिकार आयोगमा उजुरी दिएका छन् ।

आयोगले बुधवारदेखि नै प्रहरीको इन्काउन्टरमाथि अनुसन्धान थालिसकेको जनाएको छ । 

प्रहरीले भक्तपुरको सानोठिमीस्थित गोपाल र अजय डेरा गरी बस्ने कोठाबाट पक्राउ गरी उनीहरूलाई जंगलमा लगेर गोली हानी मारेको विषय अहिले चर्चामा छ । 

प्रहरीका पूर्व वरिष्ठ अधिकारीदेखि मानवअधिकारवादीहरूले अपहरणकारी भनिएका गोपाल र अजयको गैरन्यायिक हत्या भएको भन्दै विरोध जनाइरहेका छन् ।

साउन २४, २०७५ मा प्रकाशित

प्रशान्त ओझा

लोकान्तरका विशेष संवाददाता प्रशान्त ओझा अदालत, प्रशासन र संवैधानिक निकायको रिपोर्टिङ गर्छन् ।

लेखकबाट थप...

प्रतिक्रिया दिनुहोस