धर्म परिवर्तन गराउनेलाई ५ वर्ष कैद, विदेशीलाई कैदपछि देश निकाला !

साउन २४, २०७५

काठमाडौं – कसैलाई प्रलोभन देखाई धर्म परिवर्तन गराएमा अब ५ वर्ष कैद र ५० हजार जरिवाना हुने भएको छ ।

आगामी भदौ १ गतेदेखि लागू हुने मुलुकी अपराध (संहिता) ऐन २०७४ ले धर्म परिवर्तनसम्बन्धी कसुरमा ५ वर्ष जेल हुने व्यवस्था गरेको हो । 

अपराधसंहिताको दफा १५८ मा कसैले कसैको धर्म परिवर्तन गराउन वा सो कुराको उद्योग गर्न वा दुरुत्साहन दिन नहुने व्यवस्था गरिएको छ । पछिल्ला वर्षमा विभिन्न राहत वितरण, मानवीय र सामाजिक कामका लागि खटिएका विदेशीले धर्म परिवर्तन गराउने गरेको गुनासो बढेको थियो ।

‘कसैले कुनै जातजाति वा सम्प्रदायमा सनातनदेखि चलिआएको धर्म, मत वा आस्थामा खलल पार्ने कुनै काम वा व्यवहार गर्न वा खलल हुने गरी कुनै प्रलोभन देखाई वा नदेखाई अन्य कुनै धर्ममा परिवर्तन गराउन वा धर्म परिवर्तन गराउने नियतले त्यस्तो धर्म वा मत प्रचार गर्न हुँदैन,’ उपदफा २ मा लेखिएको छ । 

यस्तो कसुर गर्ने वा गराउने व्यक्तिलाई पाँच वर्षसम्म कैद र ५० हजार रुपैयाँसम्म जरिवाना हुने व्यवस्था गरिएको छ । यस्तो कसुर गर्ने विदेशीलाई कैद भुक्तान भएको ७ दिनभित्र नेपाल बाहिर पठाउनुपर्ने उल्लेख छ । 

पछिल्ला वर्षमा नेपालमा आर्थिक प्रलोभनमा धर्म परिवर्तन गराउने क्रम बढेको भन्दै सरोकारवालाले चिन्ता व्यक्त गर्दै आएका छन् । 

केही दिन पहिले हिन्दूराष्ट्र पुनस्र्थापना महाअभियानको उद्घाटन कार्यक्रममा पूर्वउपप्रधानमन्त्री एवं राप्रपा अध्यक्ष कमल थापाले धर्म परिवर्तनको डढेलोले नेपालको अस्थित्व संकटमा पार्ने बताएका थिए ।

साउन २४, २०७५ मा प्रकाशित

प्रतिक्रिया दिनुहोस