भारत भ्रमणका क्रममा अध्यक्ष प्रचण्डले प्रधानमन्त्री नरेन्द्र मोदी लगायत उच्च राजनीतिक नेतृत्वसंग भेटवार्ता गर्ने कार्यक्रम रहेको छ ।

यस्तै चीन भ्रमणमा रहँदा प्रचण्डले चिनियाँ राष्ट्रपति सी चिनफिङसंग भेट्ने तयारी छ । 

नेकपा एमाले र माओवादी केन्द्रबीच पार्टी एकता भएर नेकपा बनेपछि प्रचण्डले छिमेकी राष्ट्रको भ्रमण गर्न लागेका हुन् । नेकपा नेताहरुकाअनुसार प्रचण्डको भ्रमण मुलतःदुई देशबीचको सम्बन्ध विस्तार र नेपालले लिएको आर्थिक समृद्धिको एजेण्डामा छिमेकीको सद्भाव जुटाउनु हुनेछ । 

प्रधानमन्त्री केपी शर्मा ओलीको हालै सम्पन्न भ्रमणका क्रममा भएका सहमति कार्यान्वयका लागि वातावरण सहज बनाउनु भ्रमणको उदेश्य रहेको नेकपा नेताहरु बताउँछन् ।

नेपालमा दुईतिहाई बहुमतसहितको सरकारको नेतृत्व गरेको पार्टी नेकपामा अध्यक्ष प्रचण्डको एक हप्ताको फरकमा हुन लागेको भ्रमणलाई अर्थपूर्ण ढंगले हेरिएको छ ।