'प्रकाण्ड' अपराधी हुन्, त्यसैले पक्राउ गरिएको हो–गृहमन्त्री थापा

साउन २५, २०७५

चितवन– गृहमन्त्री रामबहादुर थापाले विप्लव नेतृत्वको  नेकपाका प्रवक्ता खड्गबहादुर विश्वकर्मा ‘प्रकाण्ड’ गैरकानुनी क्रियाकलापमा सहभागी भएकोले पक्राउ गरिएको बताएका छन् । 

शुक्रबार चितवनस्थित भरतपुर विमानस्थलमा पत्रकारसँग कुरा गर्दै गृहमन्त्री थापाले प्रकाण्डको नाममा वारेन्ट समेत जारी भएको जानकारी गराए । गैरकानुनी क्रियाकलाप गर्नेलाई सरकारले नछोड्ने भन्दै उनले अपराध नियन्त्रणका लागि सरकारले आफ्नो काम गरेको स्पष्ट पारे ।


ADVERTISEMENT

‘म गृहमन्त्री हुँ । मेरो काम अपराध नियन्त्रण गर्ने हो । त्यसैअन्तर्गत प्रकाण्ड समातिएका हुन्, उनले भने ‘कानून र विधि उल्लघंन गरेकाले प्रकाण्ड अपराधी हुन् ।’ प्रकाण्ड गैरकानुनी काम र ध्वंसात्मक गतिविधिमा संलग्न रहेको र चन्दा आतंक मच्चाएकाले पक्राउ गरिएको उनको भनाइ छ । 

प्रहरीले खड्कालाई मंगलबार साँझ करिव साढे ७ बजे दक्षिणकाली नगरपालिका १ चाल्नाखेलबाट पक्राउ गरेको थियो । जिल्ला अदालत काठमाडौंले उनलाई ५ दिन थुनामा राखेर अनुसन्धान गर्न अनुमति दिइसकेको छ । 

प्रहरीका अनुसार प्रारम्भिक अनुसन्धानका क्रममा विभिन्न उद्योगपति, व्यवसायी लगायतबाट अवैध रुपमा करिव ७ करोड चन्दा असुल गरेको पाइएको छ ।

साउन २५, २०७५ मा प्रकाशित

प्रतिक्रिया दिनुहोस

ताजा समाचार