काठमाडौं– अख्तियार दुरुपयोग अनुसन्धान आयोगले सिक्टा सिंचाइ आयोजनाको गुणस्तर परीक्षण गर्ने भएको छ । 

आयोजनाको परीक्षण गर्ने क्रममा पटक पटक नहर भत्किने समस्या देखिएपछि अख्तियारले नहरको गुणस्तर परीक्षण गर्न समिति गठन गरेको हो । आयोजनाको गुणस्तर परीक्षणका लागि अख्तियारले प्राविधिक सहसचिवको नृतत्वमा ५ सदस्यीय समिति गठन गरेको अख्तियारका प्रवक्ता रामेश्वर दंगालले बताए । 

दंगालका अनुसार समितिले आयोजना स्थलगत अध्ययन गरी नहर तथा ड्याम निर्माणमा प्रयोग भएको प्रविधि, सामग्री र त्यसको गुणस्तरबारे छानबिन गर्ने छ । 

बाँके जिल्लामा निर्माण भइरहेको सिक्टा सिंचाइ आयोजनाको ठेक्का कालिका कन्सट्रक्सनले पाएको थियो । कालिका कन्सट्रक्सन पूर्व वनमन्त्री तथा राप्रपा प्रजातान्त्रिकका नेताको कम्पनी हो । 

तर आयोजनाका ९० प्रतिशत काम सकिएको भनेर नहर परीक्षण गर्दा पटक–पटक भत्किएपछि स्थानीयले छानबिनको माग गरेका थिए । 

२०७३ साल असारमा पहिलोपटक परीक्षण गर्दा नै नहर भत्किएको थियो । भत्किएको ठाउँमा पुनर्निर्माण गरी त्यसपछि पनि नहरको परीक्षण गरिएको थियो । 

परीक्षणका क्रममा दोस्रो पटक यही साउन ७ गते ढकेरी नजीकै नहर भत्किएपछि स्थानीय तहले गुणस्तर छानबिन गर्न माग गर्दै प्रदेश र केन्द्र सरकारलाई गुहारेको थियो । 

पटक पटक नहर भत्किन थालेपछि राप्तीसोनारी गाउँपालिकाले सिक्टा सिंचाइ आयोजनाको गुणस्तरमाथि प्रश्न उठाउँदै केन्द्र र प्रदेश सरकारसँग छानबिन गर्न माग गरेको थियो ।

परीक्षणका क्रममा पहिलो पटक २०७३ असार १४ गते सोही स्थानमा नहर भत्किएको थियो । परीक्षणका क्रममा पटक पटक नहर भत्किन थालेपछि राप्तीसोनारी गाउँ कार्यपालिकाको बैठकले गुणस्तर छानबिन गर्नुपर्ने निर्णय गरेको थियो । 

राष्ट्रिय गौरवको आयोजनाका रुपमा रहेको सिक्टा सिंचाइको निर्माण पछि बाँकेको कृषि क्षेत्रमा कायापलट हुने अपेक्षा राखिएको छ ।