काठमाडौंको डिल्लीबजार घर भई गोकर्णेश्वर बस्ने प्रसन्नले डिस्कभरी च्यानलको नक्कली कार्ड देखाएर विभिन्न व्यक्तिलाई प्रभावमा पारी अमेरिका पठाइदिन्छु भन्दै ठगी गरेको भेटिएको छ । 

प्रसन्नबाट ठगिएका ३ जना पीडितले दिएको उजुरीका आधारमा उनलाई पक्राउ गरिएको सीआईबीले जनाएको छ । 

उनले एकजना पीडितलाई अमेरिका पठाइदिन्छु भन्दै २० लाख ठगेका छन् भने अर्कालाई काठमाडौंस्थित अमेरिकी दूतावासबाट एउटा परियोजना पारिदिने भन्दै २५ लाख रुपैयाँ ठगेका छन् । 

सीआईबीका अनुसार खातीले मोबाइलबाट अमेरिकाको भिसा लागेको नक्कली प्रमाण देखाएर २० लाख असुलेका छन् । 

यस्तै नेपालस्थित अमेरिकी दूतावासको कोषबाट १५ करोडको परियोजना पार्ने भन्दै २५ लाख रुपैयाँ असुल गरेको देखिएको सीआईबीका प्रहरी उपरीक्षक (एसपी) सानुराम भट्टराईले जानकारी दिए । 

खातीले सामाजिक सञ्जाल फेसबुकबाट साथी बनाएर विभिन्न व्यक्तिलाई ठगी गर्ने गरेका थिए । 

प्रविधिको दुरुपयोग गरे ठगी

खातीले विभिन्न मोबाइल एप र कम्प्युटर प्रोग्रामहरूको प्रयोगबाट नक्कली भिसा कार्ड, आइडी कार्ड र क्युआर कोड बनाएर ठगी गर्ने गरेको सीआईबीले जनाएको छ । 

पछिल्लो समय प्रविधिको दुरुपयोग गरेर ठगी गर्ने क्रम बढेको भन्दै सिआईबीले सचेत रहन आग्रह गरेको छ । उनको साथबाट नेपालमा एनएमी बैंक, बैंक अफ् अमेरिका, अमेरिकी दूतावास लगायत सरकारी र गैरसरकारी संस्था तथा निजी कम्पनीका छापसमेत बरामद भएको सीआईबीले जनाएको छ । 

अमेरिकी डलर, बेलायती पाउण्डस्टर्लिङसहित विभिन्न विदेशी मुद्राका नोट आकारका कालो रङ्गको बस्तु ( ब्ल्याक डलर)लाई रसायनको माध्यमबाट डलरमा परिणत गर्न सकिने भन्दै ठगी गर्ने क्रम पनि बढेको प्रहरीले जनाएको छ ।