सुर्खेत – दैलेखको पश्चिममा पर्ने आठबीस नगरपालिकाले नगरमा दक्ष जनशक्ति उपलब्ध हुन नसकेकाले चालू आर्थिक वर्षबाट तीन जनालाई छात्रवृत्ति दिएर अध्यापन गराउने भएको छ ।

आठबीस नगर प्रमुख खड्गराज उपाध्यायका अनुसार नगरपालिकाले एमबीबीएस अध्ययन गर्न चाहनेलाई कुल लागत खर्चको ७५ प्रतिशत छात्रवृत्ति दिने निर्णय गरेको छ ।

‘हामीले नगरमा रहेको स्वास्थ्य समस्या समाधान गर्न आफ्नै जनशक्ति हुनपर्ने आवश्यकता ठान्यौं,’ उनले लोकान्तरसँग कुरा गर्दै भने, ‘नगरवासीलाई स्तरीय स्वास्थ्य सेवामा पहुँच पुर्‍याउन सहज होस् भन्ने ध्येयका साथ आईएस्सी उत्तीर्ण गरी सबैभन्दा बढी नम्बर ल्याएका छात्र वा छात्रालाई यो छात्रवृत्ति दिने निर्णय गरेका हौं ।’

नगरप्रमुख उपाध्यायका अनुसार नगरले यही वर्षबाट एसईईमा सर्वोत्कृष्ट नम्बर ल्याई उत्तीर्ण भएका थप दुईजनालाई स्टाफ नर्स र एचए अध्यापन गराउने निर्णय पारित गरिएको बताए ।

‘हामीसँग स्वास्थ्य क्षेत्रमा जनशक्तिको अत्यन्तै अभाव छ,’ उनले भने, ‘त्यो अभावलाई टार्नका लागि हामीले नगरसभामै यो निर्णय पेश गरेका हौं ।’

नगरप्रमुख उपाध्यायले छात्रवृत्तिमा अध्ययन गरेर आएका जनशक्तिले कम्तिमा पनि तीनवर्ष नगर क्षेत्रमा अनिवार्य सेवा दिनुपर्ने बताए ।

‘जनशक्ति आइसकेपछि हामीले उनीहरूलाई तीनवर्ष सेवा अनिवार्य रूपमा नगरमा गर्नै पर्ने कबलियतनामा गराउनेछौं,’ उनले भने, ‘त्यसो गर्दा उनीहरुलाई अन्यत्र जाने मौका मिल्ने छैन र यस क्षेत्रका जनताले स्तरीय सवास्थ्य सेवा पाउनेछन् ।’

आठबीस नगरका प्रमुख प्रशासकीय अधिकृत मातृका भट्टराईले स्वास्थ्य क्षेत्रलाई संवेदनशील रूपमा लिएको बताउँदै अबको केही दिनमा छात्रवृत्तिसम्बन्धी सूचना जारी गरिने बताए ।

‘एचए र स्टाफ नर्समा छात्रवृत्तिका लागि हामीले केही दिनमा नै सूचना सार्वजनिक गर्नेछौं,’ प्रमुख प्रशासकीय अधिकृत भट्टराईले भने, ‘एमबीबीएसका हकमा भने केही समय लाग्न सक्छ ।’

यसरी नगरपालिकाले ३ जनालाई छात्रवृत्ति दिने भनी गरेको निर्णयप्रति स्थानीय विद्यार्थीहरू हर्षित भएका छन् ।

आठबीस नगरपालिका वडा नं. ४ का विद्यार्थी नमराज सिजापतीले यो निर्णय स्वागतयोग्य भएको बताए ।

त्यस्तै आठबीस नपा ६ का विद्यार्थी तेजबहादुर थापाले स्थानीय रूपमै जनशक्ति बनाउने नगरको योजना अत्यन्तै महत्त्वपूर्ण भएको बताउँदै पद र पहुँचभन्दा क्षमतावान विद्यार्थीलाई उक्त छात्रवृत्ति प्रदान गर्न नगरलाई आग्रह गरे ।