काठमाडौं– निजामति कर्मचारी संगठनका उपाध्यक्ष जीवन भण्डारीले संघीय मामिला तथा सामान्य प्रशासन मन्त्रालयका कर्मचारीमाथि हातपात गरेका छन् । 

भण्डारीले सामान्य प्रशासन मन्त्रालयको कर्मचारी प्रशासन शाखाका कर्मचारीमाथि हातपात गर्नुका साथै कार्यलय तोडफोडसमेत गरेका छन् । 

भण्डारीले कर्मचारी सरुवाको विषयलाई लिएर मन्त्रालयको कर्मचारी प्रशासन शाखाका कर्मचारीमाथि हातपात गरेका हुन् । डोल्पामा कार्यरत शाखा अधिकृत नेत्रराज गिरीलाई अनुकुल स्थानमा सरुवा गराउनुपर्ने भन्दै भण्डारीले दवाव दिँदै आएका थिए । 

आफूले भनेअनुसार गिरीलाई सरुवा नगरिएको भन्दै भण्डारीले सामान्य प्रशासन मन्त्रालयका कर्मचारीमाथि हातपात गरेका हुन् । 

उनले कर्मचारी प्रशासन शाखामा तोडफोड गर्नुका साथै कुर्सी र टेबुल समेत भाँचेको सामान्य प्रशासन मन्त्रालयका एक कर्मचारीले लोकान्तरलाई बताए । 

मन्त्रालयका स्रोतका अनुसार सचिव दिनेश कुमार थपलियाले घटनामाथि अनुसन्धान गर्न निर्देशन दिइसकेका छन् । सचिव थपलियाको निर्देशनानुसार घटनाको अनुसन्धान शुरु भइसकेको स्रोतले लोकान्तरलाई बतायो । 

उपाध्यक्ष भण्डारीले आइतवार दिउँसो साढे ३ बजे सामान्य प्रशान मन्त्रालयको कर्मचारी प्रशासन शाखाका कर्मचारीमाथि हातपात गरेका हुन् । निजामति कर्मचारी संगठन तत्कालीन नेकपा एमाले निकट कर्मचारी संगठन हो ।