काठमाडौं – बार्सिलोनाका अध्यक्ष जोसेप मारिया बार्तोमिउले म्यानचेस्टर युनाइटेडका खेलाडी पल पोग्बासँगको सम्पर्कका बारेमा कुराकानी गर्न नमाने पनि उनलाई ट्रान्सफर विन्डो बन्द हुनुअघि क्लबमा भित्र्याउन सकिने संकेत दिएका छन् । 

ला लिगा च्याम्पियन बार्साले फ्रान्सेली मिडफील्डर पोग्बालाई ल्याउन केही समय अघिदेखि नै प्रयास गरिरहेको छ । म्यानचेस्टर युनाइटेड प्रशिक्षक जोसे मउरिन्होसँग सम्बन्ध बिग्रिएपछि पोग्बा पनि बार्सिलोना आउन चाहिरहेको खबर पनि आइरहेका छन् । 

पोग्बाले प्रिमियर लीगको नयाँ सीजनको पहिलो खेलमा कप्तानको पट्टा लगाएर गोल समेत गरेको भएपनि मउरिन्होसँगको उनको असहज सम्बन्ध कायम छ ।

आफूले चाहेजस्तो कुरा बोल्दा जरिवाना लाग्ने भएकाले केही नबोल्ने भनी उनले म्याचपछि पत्रकारहरूलाई बताएर म्यानचेस्टर युनाइटेडमा बस्न मन नगरेको संकेत दिएका छन् । 

प्रिमियर लीगको विन्डो बिहीवारै सकिएको भएपनि स्पेनी क्लबहरूले अगस्टको अन्तिम दिनसम्म खेलाडी खरिदबिक्री गर्न पाउँछन् । 

बार्सिलोनाबाट महान् खेलाडी आन्द्रेस इनिएस्ता निस्केपछि मिडफील्डलाई बलियो बनाउन क्लब पोग्बामा केन्द्रित भएको हो । 

‘हामीले इनिएस्ता जस्तो अर्को खेलाडी त पाउन असम्भव छ,’ बार्साका प्रमुख प्रशिक्षक अर्नेस्टो भाल्भेर्देले बताए, ‘म खेलाडी ल्याउने कुरा सोचिबस्दिनँ । म आफ्नो टोलीको बारेमा सोच्छु र अर्को म्याचको तयारी गर्छु । तर विन्डो बन्द नहुन्जेल जे कुरा पनि सम्भव छ ।’

गोल डट्कमबाट