काठमाडौं – नेपालले भारतको बिहारस्थित चम्पारण जिल्लाको लगभग ७१ सय एकड जमीनमा कब्जा गरेको भारतीय पत्रिका जनसत्ताले लेखेको छ । 

बुधवार जनसत्ताको अन्लाइन संस्करणमा छापिएको खबरअनुसार, भारतको जमीनमा नेपालले लगातार कब्जा गरिरहेको छ । 

वाल्मीकिनगरमा सुस्ता, वाल्मीकि टाइगर रिजर्भको जंगल र गोवर्धना अनि शिवालिकका डाँडामा नेपालले कब्जा जमाएको छ । नेपालले यी क्षेत्रमा जमीनको कागजात पनि बनाउन लागेको पत्रिका लेख्छ । 

यस विषयमा सोध्दा उक्त क्षेत्रका डीएम निलेश रामचन्द्र देवरलाई सोध्ला उनले यो अन्तर्राष्ट्रिय विषय भएको बताए । उनले यो जमीन अतिक्रमणको घटना भएको बताए । 

दोहोरो नागरिकताका कारण मानिसले फाइदा उठाइरहेका छन् । इलाकाको जंगलबाट करोडौं रुपैयाँबराबरका रुख काटिएका छन् । 

अतिक्रमणका कारण वाल्मीकिनगरको सुस्ता सबभन्दा बढी प्रभावित छ । नेपालको त्रिवेणी थाना पनि सुस्तामा पर्छ । 

त्यहाँ अस्पताल, विद्यालय र सडक पनि बनाइएका छन् । नेपाल अब भीटीआर जंगल र शिवालिकका डाँडामा पनि दाबी गर्दैछ । 

सुस्तामा बस्ने ९५ प्रतिशत मानिस अहिले पनि भारतीय छन् । नेपालले यस्तो कदम उठाउँदा पनि भारतीय सरकारले ठोस कदम नउठाएको पत्रिका लेख्छ । 

सन् १८१५ मा भएको सुगौली सन्धिलाई सन् १९६० मा खुकुलो बनाइएको पत्रिका लेख्छ । सन् २००५ मा भएको सन्धिमा भारत सरकार नेपालप्रति थप नरम भएको पत्रिकाको दाबी छ । 

दुई देशको सीमा विवादका सम्बन्धमा सन् २००६ र २००७ मा सम्झौता भएका थिए । वर्षैपिच्छे दुवै देशका सीमाक्षेत्रमा अधिकारीहरू बैठक पनि गर्छन् तर कुनै परिणाम निस्कँदैन ।