काठमाडौं– नेपाल कम्युनिस्ट पार्टी (नेकपा)की सांसद रामकुमारी झाँक्रीले नाजायज नाफा कमाएर समाजको प्रतिष्ठित व्यक्ति बन्ने दौडका कारण नेपालका उपभोक्ता ठगिएको बताएकी छिन् ।

प्रतिनिधिसभामा उपभोक्ता संरक्षण विधेयक– २०७५ माथिको सैद्धान्तिक छलफलका क्रममा सांसद झाक्रीले विद्यमान कानून र संरचना उपभोक्ता ठग्नेको रक्षाकवज भएको बताएकी हुन् । 

ʻउपभोक्ता मान्छे हुन् या होइनन्, आजको पूजीँबजारले उपभोक्तालाई मान्छे बनाएकै छैन । लूटपाट गर्ने, सबै काम फर्जी गर्ने, जेबाट अत्याधिक नाफा आउँछ त्यही गर्ने, त्यसबाट आएको मार्जिनबाट पैसा धेरै भएको गन्ने मान्ने समाजको प्रतिष्ठित बन्ने दौड आजकोे पूँजीवाद, बजार र समाजले यतैतर्फ दौडाइरहेको छ,ʼ सांसद झाँक्रीले भनिन्, ʻयसलाई नियन्त्रण गर्न बनाइएका कानून र संरचना जोसँग पैसा छ त्यसैको संरक्षक या कबज बनेका छन् ।ʼ

उपभोक्तालाई आफू के खाँदैछु, के गर्दैछु भन्ने न्युनतम सूचना समेत नभएको बताइन् ।

ʻस्वस्थ्य खानेकुरा पाउने कुरा धेरै टाढा, के सेवन गरिरहेको छु भन्ने जानकारी पनि छैन,ʼ उनले भनिन् ।

उनले बजेटपछाडि मूल्यवृद्धि नियन्त्रणका लागि बजार अनुगमनको सनातनी काम भइरहे पनि दोषीमाथि कारवाही नभएको बताइन् । 

ʻबजेटको पछाडि केही दिन अगाडि बजारमा छापा मार्ने काम भयो, एकाएक रोकियो । अब तिज दशैँ तिहारमा फेरि सक्रिय हुनेछन् । यो सनातनी भइरहेको छ,ʼ उनले भनिन् ।

झाक्रीले गरीब निमुखा उपभोक्ताको ढाड सेक्ने काम राज्य नियन्त्रित संरचनाबाट भइरहेको दाबी गरिन् । 

ʻकेही वर्ष अगाडि शहरमा खाना पकाउने वस्तुको रूपमा मट्टिेल प्रयोग हुन्थ्यो, मिसावट कम भएको भनेर रंग फरक भयो । तर ठूला बढाकोे गाडीको इञ्जिन बिग्रयो भनेर मूल्य समायोजन गरियो । विश्वबजारमा मट्टिेतेल र डिजेलको मूल्य कही एउटै हुँदैन, तर यहाँ गरियो,ʼ उनले भनिन्, ʻगरीब र निमुखा उपभोक्ताको ढाड सेक्ने काम भएका छन् । जे जति उपभोक्ताको विरुद्धमा काम भएका छन् ती राज्य संरक्षित छन् ।ʼ