काठमाडौं – दक्षिण अमेरिकी मुलुक इक्वेडरमा बस दुर्घटना भएको खबर छ । दुर्घटनामा २३ जनाको मृत्यु भएको छ र १४ जना घाइते भएका छन् ।

दुर्घटना इक्वेडरको राजधानी क्विटोनजिक मंगलवार भएको हो । 

कोलम्बियामा दर्ता गरिएको बस क्विटो जाँदै गर्दा अचानक अर्को वाहनसँग ठोक्किन पुग्यो र पल्टियो । बसमा कोलम्बिया र भेनेजुएलाका यात्रीहरू सवार थिए । 

क्विटो फायर डिपार्टमेन्ट अधिकारी भेरोनिका तोआपन्तले दुर्घटना मिर्मिरे बिहान पिफो र पापाल्लाक्टा शहरहरू बीचको एक ठाउँमा भएको जानकारी दिइन् । 

इक्वेडरमा सवारी दुर्घटना मृत्युका प्रमुख कारण बन्ने गरेका छन् । जस्टिसिया भियाल नामक संस्थाका अनुसार, दिनहुँ औसत सातजनाको दुर्घटनामा परी मृत्यु हुने गरेको छ भने ८० जना घाइते हुने गरेका छन् । 

यस्ता दुर्घटनामध्ये ९० प्रतिशत मानवीय त्रुटिका कारण हुने समूहको आँकडा छ । 

आइतवार मात्र एक बस दुर्घटना हुँदा १२ जना मारिएका थिए भने ३० जना घाइते भएका थिए ।

एजेन्सी