काठमाडौं –सरकारले राष्ट्रिय पुनर्निर्माण प्राधिकरणको प्रमुख कार्यकारी अधिकृत (सीईओ)मा सुशील ज्ञवालीलाई पुनः नियुक्त गरेको छ ।

नेपाल सरकार मन्त्रिपरिषद्को मंगलबारको बैठकले ज्ञवालीलाई नियुक्त गरेको मन्त्रिपरिषद् स्रोतले बतायो । ज्ञवालीलार्इ नियुक्ति पत्र दिने पक्रिया चलिरहेकाे मन्त्रिपरिषद् स्राेतले बतायाे । 

मन्त्रिपरिषद्को निर्णय २४ घण्टा गोप्य राख्ने भन्दै सो निर्णय सार्वजनिक गरिएको थिएन । 

केपी शर्मा ओली प्रधानमन्त्री पहिलोपटक प्रधानमन्त्री बनेपछि २०७२ पुस १० गते ज्ञवाली प्राधिकरणको सीईअाे नियुक्त भएका थिए ।

पुनर्निर्माणले गति लिन नसकेको भन्दै ओली सरकार ढलेसँगै ज्ञवालीलाई २०७३ पुस २७ मा बर्खास्त गरी गोविन्द पोखरेललाई सीईओ नियुक्त गरिएको थियो ।

चुनाव लड्न भन्दै पोखरेलले राजीनामा दिएपछि युवराज भुसाल प्राधिकरणको तेस्रो सीईओ बनेका थिए ।

निर्वाचन आचारसंहिता लागू भएसँगै पूर्ववर्ती सरकारले गरेका राजनीतिक निर्णय खारेज गर्ने वर्तमान सरकारको निर्णयका कारण भुसालको पद खोसिएको थियो ।

प्राधिकरणको सीईओको रूपमा ज्ञवालीले एक वर्ष काम गरेका थिए ।