काठमाडौं – युरोपेली मुलुक इस्टोनियाको राजधानी टालिनमा बिहीवार बिहान पौने १ बजे रियल मड्रिड र एट्लेटिको मड्रिडबीच प्रतिस्पर्धा हुँदैछ । 

यूईएफए सुपरकपको यो भिडन्त च्याम्पियन्स लीग विजेता र युरोपा लीग विजेताबीच हुने गर्छ । रियल च्याम्पियन्स लीग विजेता हो भने एट्लेटिको युरोपा लीग विजेता हो ।

एट्लेटिको मड्रिड र रियल मड्रिड दुवै क्लबमा विश्वस्तरीय फूटबल खेलाडीहरू छन् । दुई मड्रिड क्लबको भिडन्तलाई मड्रिड डर्बी भनिन्छ ।

च्याम्पियन्स लीगविजेता रियलले सुपरस्टार क्रिस्टियानो रोनाल्डोविनाको पहिलो प्रतिस्पर्धात्मक खेल खेल्न गइरहेको छ । उनी युभेन्टस गएपछि अब ग्यारेथ बेल र करिम बेन्जेमामाथि गोल गर्ने चुनौती छ । 

एट्लेटिकोसँग डीएगो कोस्टा र आत्वाँ ग्रीजम्यान भएकाले फ्रन्टमा कसलाई खेलाउने भन्ने समस्या हुन सक्छ । 

एट्लेटिकोका प्रशिक्षक डीएगो सीमियोनले आफ्नो क्लब रियल मड्रिड र बार्सिलोनाकै स्तरमा रहेको बताउने गरेका छन् । 

बार्सिलोनाले ग्रीजम्यानमा पहिलेदेखि नै चासो राखेको भएपनि एट्लेटिकोले उनलाई आफूसँगै राख्न सफल भएको छ । अनि उसले गत जनवरीमा डीएगो कोस्टालाई ल्याएको थियो । उनीहरू बाहेक पनि एट्लेटिकोले अन्य उम्दा फूटबलरहरू भित्र्याएको छ । 

एट्लेटिकोले रियललाई ला लिगामा धेरैचोटि हराएको छ र हालैका सीजनहरूमा कोपा देल रेमा पनि हराउने गरेको छ । तर युरोपेली स्तरमा भने कथा अलि फरक छ । 

हुन त रियल प्रशिक्षक जिनेदिन जिदान र क्रिस्टियानो रोनाल्डो बिदा भएपछि सम्हालिने क्रममा छ । त्यसैले एट्लेटिकोले रियललाई हराएर युरोपेली स्तरमा राम्रो सन्देश दिनका लागि सुनौलो अवसर पाएको छ । 

समाचारहरूमा आएअनुसार, रियलले पुरानै गोलकीपर कीलोर नाभासलाई खेलाउनेछ । थिबाउ कोर्टोआ अघिल्लो हप्ता मात्र रियल आएकाले उनलाई टोलीमा राखिएपनि उनले खेल्ने सम्भावना छैन । 

रियलका प्रशिक्षक युलेन लोपेतेगुईले २१ वर्षीय डिफेन्डर जिसस भालेयोलाई खेलाउने सोच बनाएका भएपनि उनको मांसपेशीमा चोटका कारण यो महिनाभरि नखेल्ने सम्भावना छ । 

एट्लेटिकोका दुई प्रमुख खेलाडी ग्रीजम्यान र लुकास हर्नान्डेजलाई शुरूबाट नखेलाइने सम्भावना छ किनकि उनीहरू अघिल्लो हप्ता मात्र छुट्टीबाट फर्केका हुन् । टमस लेमार चाहिँ प्रिसीजनमा पनि खेलेकाले भोलिको खेलमा उनी
देखिने सम्भावना छ । 

रियल मड्रिड र एट्लेटिको मड्रिडले युरोपेली खेलमा भोलिसमेत गरी दशपटक भिडन्त गरेका छन् । 

ग्यारेथ बेलको लोभलाग्दो ओभरहेड किकले लोस ब्लान्कोस भनी चिनिने रियललाई लगातार तेस्रोपटक च्याम्पियन्स लीग उपाधि दिलाउन योगदान गरेको थियो । फाइनलमा रियलले लिभरपूललाई ३–१ ले हराएको थियो ।

उता एट्लेटिकोले युरोपा लीगको फाइनलमा मार्सेइलाई ३–० ले हराएको थियो र त्यसमा ग्रीजम्यानले दुई गोल गरेका थिए । 

स्ट्यान्डर्ड डट् को डट् यूकेबाट