काठमाडौं - नेपाल लाइफ इन्स्योरेन्स कम्पनीले गत आर्थिक वर्ष २०७४÷०७५ मा ४७ करोड ९२ लाख रुपैयाँ नाफा गरेको छ । यो कम्पनीको लेखापरीक्षण अघिको विवरण हो । बीमा कम्पनीहरुले ‘एक्चुरियल मूल्याङ्कन’ गर्नुपर्ने भए पनि यो बीमाङ्कीय मूल्याङ्कन तथा लेखापरीक्षण नगरिएको विवरण हुँदा थपघट हुनसक्ने कम्पनीले जनाएको छ । कम्पनीले अघिल्लो वर्ष लेखापरिक्षण हुनु भन्दा अघिको नाफा ४१ करोड रुपैयाँ थियो भने लेखा परीक्षणपछि एक अर्ब रुपैयाँ रहेको छ ।

कम्पनीले गत वर्षको बीमा शुल्क आर्जन ३२ प्रतिशतले बढाएको छ । असारसम्ममा १६ अर्ब रुपैयाँ बीमा शुल्क आर्जन गरेको छ ।

कम्पनीको वित्तीय विवरण अनुसार कम्पनी गत आर्थिक वर्षमा नाफा १५ प्रतिशतले बढाउन सफल भएको हो । लगानी तथा व्याज आम्दानीबाट तीन अर्ब ९७ करोड रुपैयाँ आम्दानी गरेको छ। यस्तो आम्दानी अघिल्लो वर्षको तुलनामा ५९ प्रतिशतले बढी हो । कम्पनीले गत वर्ष खुद दाबी भुक्तानी ५ अर्ब ४३ करोड रुपैयाँको गरेको छ भने बाँकी दाबी भुक्तानी ७३ करोड ९४ लाख रुपैयाँको गरेको छ । कम्पनीको चुक्ता पूँजी ४ अर्ब ३९ करोड रुपैयाँ छ भने जगेडा कोषमा तीन अर्ब ४७ करोड रुपैयाँ जम्मा भएको छ ।

कम्पनीको बीमाङ्कीय मूल्याङ्कन अगाडी प्रतिशेयर आम्दानी १० रुपैयाँ छ । गत वर्ष यस्तो मूल्याङ्कन पस्चात ३२ रुपैयाँ थियो ।