ताप्लेजुङ– हिमाली जिल्ला ताप्लेजुङमा कलिलै उमेरमा आमा बन्नेको संख्या उल्लेख्य रहेको छ । बढ्दो क्रममा रहेको बाल विवाहसँगै कलिलो उमेरमा आमा बन्नेको संख्या बढ्दै गएको हो । 

एक तथ्याङ्क अनुसार जिल्लामा २० वर्षकै उमेरमा आमा बन्ने ३१ प्रतिशत बढी रहेका छन् । जिल्लामा बाल विवाह गर्नेको संख्या बढेसँगै कलिलो उमेरमा आमा बन्ने अर्थात् सन्तान जन्माउनेको संख्या बढेको हो । 

कानुनी व्यवस्था अनुसार विवाह गर्ने न्यूनतम उमेरभन्दा कम उमेरमा विवाह गर्नुलाई बाल विवाह भनिन्छ । बाल विवाह हुने गरेकै कारण कम उमेरमै सन्तान जन्माउनेको संख्या उल्लेख्य रहेको जिल्ला स्वास्थ्य कार्यालय ताप्लेजुङले जनाएको छ । 

जिल्ला स्वास्थ्य कार्यालयको तथ्याङ्क अनुसार आर्थिक वर्ष २०७४÷७५ मा मात्रै ताप्लेजुङमा २० वर्षको उमेरमा आमा बन्ने वा शिशु जन्माउनेको सङ्ख्या ३१.३८ प्रतिशत रहेका छन् । जिल्ला स्वास्थ्य कार्यालयका सूचना अधिकारी पुण्यमणि तिम्सिनाका अनुसार गएको आवमा कुल एक हजार १७२ जनाले शिशु जन्माएका छन् ।

उक्त सङ्ख्यामध्ये जिल्ला अस्पतालमा सात सय १९ जनाले प्रसूति सेवा लिएको सूचना अधिकारी तिम्सिनाले जानकारी दिनुभयो ।, गोखरापत्रमा खबर छ ।