काठमाडौं – एनआईसी एसिया बैंकको धादिङमा ३ शाखा कार्यालय स्थापना गरेको छ ।

धादिङको धुनिबेशी नगरपालिका–७ स्थित खानीखोला शाखा र धुनिबेशी–६ धार्केस्थित धार्के शाखालाई धुनिबेशी नगरपालिका प्रमुख (मेयर) बालकृष्ण आचार्यले उद्घाटन गरेका छन् भने थाक्रे गाउँपालिका–६ महादेवबेशीस्थित महादेवबेशी शाखालाई थाक्रे गाउँपालिकाका अध्यक्ष रामकुमार आचार्यले उद्घाटन गरेका छन् ।

सर्वसाधारणले गरेको भरोसाले गर्दा मुलुकभर २ सय ३७ शाखा, २ सय ३० एटीएम, १४ वटा एक्सटेन्सन काउन्टर र १७ वटा शाखारहित बैंकिङ्ग इकाइमार्फत् सेवा प्रदान गरेर मुलुककै सबैभन्दा ठूलो शाखा सञ्जाल भएको बैंक हुन सफल भएको छ । 

बैंकको वासलातको आकार १ सय ८१ अर्ब रुपैयाँभन्दा बढी पुगेको छ भने निक्षेप करीब १ सय ५३ अर्ब रुपैयाँ पुगेर निजी क्षेत्रबाट स्थापित बैंकमध्ये नेपालको सबैभन्दा ठूलो बैंक बनेको छ । कर्जातिर करीब १ सय २४ अर्ब रुपैयाँसहित निजी क्षेत्रका बैंकमध्ये दोस्रो ठूलो बैंकको रुपमा आफ्नो पहिचान बनाउन सफल भइसकेको छ ।

बैंकमा ग्राहकको संख्या करीब १२ लाख १९ हजार रहेको छ । संस्थागत सुशासन, जोखिम व्यवस्थापन र आन्तरिक नियन्त्रण प्रणालीको उत्कृष्ट अभ्यासलाई बैंकले पालना गर्दै आएको बैंकका नायव प्रमुख सूचना अधिकारी अर्जुनराज खनियाँले बताए ।