काठमाडौं – लियोनेल मेस्सीले आन्द्रेस एनिएस्ता, जाभी र कार्लेस पुयोलको पदचिह्न पछ्याउन पाउनु र उनीहरूबाट सिक्ने अवसर पाउनुले बासिलोनाको नयाँ कप्तानको भूमिकालाई सहज बनाएको बताएका छन् । अब आफ्नो लक्ष्य च्याम्पियन्स लीग ट्रफी क्याम्प नूलाई फिर्ता ल्याउनु रहेको उनी बताउँछन् । 

बार्सिलोनाका साबिकका कप्तान इनिएस्ता जापानी क्लब भिस्सेल कोबेबाट खेल्न थालेपछि मेस्सीलाई कप्तानी दिइएको हो । 

बार्साका यी फर्वार्डले क्याम्प नूमा भेला भएका मानिससमक्ष परम्परागत रूपमा कप्तानले गर्ने सम्बोधन गरेका थिए । बुधवार जोआन गाम्पर ट्रफीका लागि बोका जुनियर्सविरुद्ध भएको प्रतिस्पर्धाअगाडि उनले सम्बोधन गरेका हुन् । 

‘शुरूमा त, कप्तान हुन पाउनु मेरा लागि गर्वको कुरा हो । बार्साको कप्तान हुनुको अर्थ के हो मलाई थाहा छ । मैले पुयोल, जाभी र महान् आन्द्रेस जस्ता खेलाडीबाट सिक्न पाएँ,’ उनले भने ।

मेस्सीले अघिल्लो सीजनको च्याम्पियन्स लीगको क्वार्टरफाइनलमा रोमाविरुद्धको हारपछि अब आफ्नो पहिलो एजेन्डा च्याम्पियन्स लीग जित्नु रहेको बताए । 

‘यो वर्ष हामीले उत्साहित हुने अवसर सिर्जना गरेका छौं । भित्र्याइएका नयाँ खेलाडीले हामीलाई थप राम्रो बनाउनेछन् भन्ने विश्वास गर्छु । अघिल्लो वर्ष हामीले ला लिगा र कोपा देल रे जितेको भएपनि च्याम्पियन्स लीगमा हार बेहोर्नुप–यो । त्यो सुन्दर कप क्याम्प नूमा फर्कियोस् भन्नका लागि गर्नुपर्ने सबै काम गर्छौं भन्ने हाम्रो प्रतिज्ञा छ,’ मेस्सीले भने ।

गोल डट्कमबाट