काठमाडौं– युरोपा लिग फुटबलको बिहीबारराति भएको दोस्रो लेगमा जेनिट सेन्ट पिटर्सबर्गले उत्कृष्ट प्रदर्शन गरेको छ । उसको पछिल्लो ३३ वर्षमा सबैभन्दा उत्कृष्ट पुनरागमन हो । 

पहिलो लेगमा ४–० ले पराजित भएर पनि जेनिटले दोस्रो लेगमा प्रभावशाली पुनरागमन गर्यो । डिनामो मिन्स्कलाई ८–१ ले हराउँदै अघिल्लो चरणमा समग्रमा ८–५ को जितसहित स्थान पक्का गरेको छ ।

रुसी क्लबलाई बेलारुसको क्लबले पहिलो लेगमा निराश पारेको थियो । तर दोस्रो लेगमा १८ मिनेट १० खेलाडीमा सीमित भएर पनि जेनिटले जित निकाल्यो ।

घरेलु मैदानमा भएको विश्वकपमा उत्कृष्ट प्रदर्शन गर्दै नायक बनेका रुसका अर्तेम डिज्युबाले यो खेलमा ह्याट्रिक गरे । उनले ७५ र ७८ औँ मिनेटमा गोल गरेपछि खेल अतिरिक्त समयमा धकेलियो । डिनामोका लागि ९९ औँ मिनेटमा याहायाले एक गोल फर्काए ।

त्यसपछि जेनिटका लागि १०९ औँ मिनेटमा ड्रिउसीले गोल गरे भने ११५ औँ मिनेटमा डिज्युबाले गोल गर्दै ह्याट्रिक पूरा गरे । यस्तै माकले अतिरिक्त समयको इन्जुरी समयमा दुई गोल गरे । यो जितसँगै जेनिट युरोपा लिग छनौटको चौथो चरणमा प्रवेश गरेको छ ।