धरान–धरान उपमहानगरपालिकाले अनुमान गरिएको प्रगति बजेटको तुलनामा आर्थिक वर्ष २०७४/७५ मा ९४ दशमलव ५० प्रतिशत प्रगति भएको प्रतिवेदन सार्वजनिक गरेको छ ।

जनप्रतिनिधिहरूले स्थानीय सरकार संचालन गरेको पहिलो वर्ष नै धरानले विकास निर्माणमा उल्लेख्य प्रगति गरेको प्रतिवेदन सार्वजनिक गरिएको हो । धरानको आर्थिक वर्ष २०७४/७५ को वार्षिक समिक्षा कार्यक्रममा १ अर्ब ५४ करोड, ४ लाख ४५ हजार ९ सय ५१ रुपैयाँको आयव्ययमा प्रगति गरिएको प्रतिवेदनमा उल्लेख गरिएको छ । 

प्रतिवेदनका अनुसार धरानले पुँजीगत तर्फ १ अर्ब २३ करोड ६८ लाख ५८ हजार ८ सय १९ रुपैयाँ खर्च गरेको छ भने चालु खर्च तर्फ ३० करोड ३५ लाख ८७ हजार १ सय ३५ रुपैयाँ खर्च भएको छ । योजनाहरुलाई प्राथमिकिरण गरेर कार्यान्यवन गर्न नसक्दा लक्ष्य अनुसारको कार्य गर्न नसकिएको धरान उपमहानगरपालिकाले जनाएको छ । 

उपमहानगरपालिकाको आन्तरिक आय तर्फ १६ करोड ४६ लाख ९७ हजार ५ सय ४० रुपैया रहेको छ भने बाह्य आय तर्फ १ अर्ब ३३ करोड १२ हजार ८ सय १८ रुपैयाँ आय प्रगति रहेको जनाएको छ ।