बुटवल – नेपाली कांग्रेस रूपन्देही स्थानीय तहले जनताको ढाड सेक्ने गरी करको दायरा वृद्धि गरेको भन्दै सडकमा उत्रिएको छ ।

सडकमा केन्द्रदेखि स्थानीय तहले कर बढाएको भन्दै पुष्पलाल पार्कदेखि जुलुस निस्केर बुटवल उपमहानगरपालिमा ज्ञापनपत्र बुझाएको छ । बुटवलको अस्पताल लाइनमा भेला भएका कांग्रेस नेता कार्यकर्ता नारा जुलुस गर्दै बुटवल उपमहानगरपालिका पुगेका थिए । उपमहानगरपालिकाका प्रमुख शिवराज सुवेदीलाई कार्यकक्षमा गएर ज्ञापनपत्र बुझाएका थिए ।

नगर प्रमुख सुवेदीलाई ज्ञापनपत्र बुझाउँदै कांग्रेस नगर सभापति खेलराज पाण्डेले बहुमतको नाममा सहमति, सहकार्य र सरसल्लाहको संस्कृति त्यागेर उपमहानगरपालिका एकलौटी रुपमा अघि बढेको र जनताले थेग्नै नसक्ने गरी कर बढाएकाले बाध्य भएर आन्दोलनमा उत्रिएको बताए । 

उनले नगरपालिकाले कर सम्बन्धमा गरेका निर्णय र कर पुस्तिका समेत सार्वजनिक नगरी वेभसाइडमा छ भनी गैरजिम्मेवार जवाफ दिने गरेको बताए । बुटवलमा ३५ सय प्रतिशतसम्म कर बढाएको कांग्रेस नेताको आरोप छ ।

ज्ञापनपत्र बुझ्दै नगर प्रमुख सुवेदीले भने, ‘दल, संघसंस्था वा नागरिक समाज कसैलाई उपेक्षा गरी उपमहानगरपालिका अघि नबढेको र सबैसँग मिलेर सहकार्य गरेर अघि बढ्नुपर्छ । त्यसैमा बुटवलको विकास र समृद्धि सम्भव छ भन्ने नीति अंगिकार गरेको छ ।’ उनले करका सम्वन्धमा बाहिर हल्ला भएजस्तो बृद्धि नभएको र कहीँ कतै नमिलेको भए सच्याउन सकिने बताए । 

धमाधम सूचना निकालेर करको दायरको जानकारी

देशभरका स्थानीय तहले करको दर वृद्धि गरेको भन्दै चौतर्फी विरोधका स्वरहरू आउन थालेपछि रूपन्देहीका केही स्थानीय तहले सूचना निकालेर आफूहरू लिने करको विवरण सार्वजनिक गरेका छन् । शुक्रबार बुटवल उपमहानगरपालिका र तिलोत्तमा नगरपालिकाले विज्ञप्ति प्रकाशित गरी करको दर वृद्धि नगरेको बरू केही करका दायरा घटेको देखाए ।

तिलोत्तमा नगरपालिकाले जन्म दर्ता, विवाह दर्ता, बसाई सराई, सम्बन्धविच्छेद, मृत्यु दर्ता, स्वास्थ्य सम्बन्धी सिफारिस निःशुल्क गर्ने सूचनामा उल्लेख छ । 

त्यसैगरी, निवेदन दस्तुर १० रुपैयाँ, नगरिकता प्रमाणपत्र सिफारिस,  स्वदेशका लागि गरिने सामान्य सिफारिस, छात्रवृत्ति नेपाली भाषामा गरिसने सिफारिस १ सय ५० रुपैयाँका दरले लिइने छ भने नाता प्रमाणित गरेको २ सय ५० रुपैयाँ रहेको नगरपालिकाका कर अधिकृत इन्द्रदत्त सापकोटाले बताए ।

बुटवल उपमहानगरपालिकाले वडा नम्बर १ ले पनि सूचना निकालेर सेवा दिँदा लिने शुल्क सार्वजनिक गर्यो । जन्म, विवाह, बसाइसराइ, सम्बन्धविच्छेद, मृत्यु, छात्रावृत्ति सिफारिस सबै निःशुल्क रहेको वडा अध्यक्ष महेन्द्र लिगलले बताए ।