काठमाडौं– नेत्रबिक्रम चन्द नेतृत्वको नेपाल कम्युनिस्ट पार्टी (नेकपा)का केन्द्रीय प्रवक्ता खड्ग बहादुर विश्वकर्मा (प्रकाण्ड) सर्वोच्च अदालत बाहिरबाट शुक्रवार पुनः पक्राउ परेका छन् । 

बन्दीप्रत्यक्षीकरणको मुद्दामा सर्वोच्च अदालतले रिहा गरेका प्रकाण्डलाई प्रहरीले पुनः पक्राउ गरेको हो । एनसेलका टावरलगायत विभिन्न निजी र सार्वजनिक सम्पत्तिमा आगजनी गरी क्षति पुर्याएको अभियोगमा प्रकाण्डलाई पुनः पक्राउ गरिएको प्रहरी स्रोतले जनाएको छ । 

यसअघि साउन २२ गते (मंगलवार) काठमाडौंको चाल्नाखेलबाट पक्राउ परेका प्रकाण्डले विभिन्न व्यवसायीबाट ७ करोड रुपैयाँ बराबरको अवैध चन्दा असुलेको बताएको थियो । 

प्रहरीले उनीविरुद्ध चन्दा असुलीको मुद्दामा अनुसन्धान अगाडि बढाउँदा नरेन्द्र बहादुर सिंह विश्वकर्माले साउन २७ गते सर्वोच्च अदालतमा बन्दीप्रत्यक्षीकरणको रिट दायर गरेका थिए । 

नरेन्द्रले दायर गरेको रिटमा सुनुवाइ गर्दै शुक्रवार सर्वोच्चका न्यायाधीश चालेन्द्र शम्शेर जबरा र तेजबहादुर केसीको इजलाशले प्रकाण्डलाई रिहा गर्न आदेश दिएको थियो ।