काठमाडौं– हार्दिक पाण्डेयले पाँच विकेट लिएसँगै इंग्ल्याण्ड भ्रमणमा रहेको भारतीय टोली तेस्रो टेस्टमा बलियो लयमा देखिएको छ । आइतबार दोस्रो दिनको खेल सकिँदा भारतले घरेलु टोली इंग्ल्याण्डमाथि २९२ रनको अग्रता लिएको छ ।

लगातार दुई हारसहित भारतीय टोली पाँच टेस्टको शृङ्खलामा २–० ले पछि रहेको छ । तेस्रो टेस्टमा जितको नतिजा निकाल्ने दाउमा भारतीय टोली छ ।  

भारतले पहिलो पारीमा ३२९ रन बनाएपछि आफ्नो पहिलो पारीको ब्याटिङ्ग गरेको इंग्ल्याण्डले राम्रो गर्न सकेन । घरेलु टोलीले पहिलो पारीमा सबै विकेटको क्षतिमा मात्रै १६१ रन बनायो ।

उसका लागि जोस बट्लरले ३९, एलिस्टर कुकले २९ तथा किटन जेनिग्सले २० रन बनाउनु बाहेक अरुले खासै राम्रो प्रदर्शन गर्न सकेनन् ।

भारतका लागि हार्दिक पाण्डेयले पाँच विकेट लिए भने जसप्रित बुमराह र इशान्त शर्माले समान दुईदुई विकेट लिए । त्यसपछि आफ्नो दोस्रो पारीको ब्याटिङ्ग थालेको भारतले दुई विकेटको क्षतिमा १२४ रन बनाएको छ ।

३३ रन बनाएका चेतेश्वर पुजारा र ८ रन बनाएका कप्तान विराट कोहली क्रिजमा छन् । पहिलो टेस्टमा ३१ रनले हारेको भारत दोस्रो टेस्टमा एक पारी र १५९ ले पराजित भयो ।