सरकारी अनुगमनकर्तालाई थुन्ने तरकारी व्यवसायीका नेता पक्राउ

फाइल तस्बिर
भदौ ४, २०७५

काठमाडौं– अनुगमनमा निस्किएको सरकारी टोलीलाई थुनेर राख्ने काठमाडौंको कालिमाटीस्थित तरकारी व्यवसायीका नेतालाई प्रहरीले पक्राउ गरेको छ । 

महानगरीय प्रहरी बृत्त कालिमाटीबाट खटिएको प्रहरीको टोलीले कालिमाटी फलफूल तथा तरकारी व्यवसायी संघका अध्यक्ष भरत खतिवडालाई पक्राउ गरेको हो । 


ADVERTISEMENT

सोमवार विहान कालिमाटी तरकारी बजारको अनुगमनका निस्किएको सरकारी टोलीलाई नियन्त्रणमा लिएको अभियोगमा खतिवडा पक्राउ परेका हुन् । 

सरकारी टोलीलाई नियन्त्रणमा लिने अन्य व्यक्तिको पनि खोजी भइरहेको महानगरीय प्रहरी परिसर काठमाडौंको प्रमुख प्रहरी वरिष्ठ उपरीक्षक (एसएसपी) बसन्त लामाले जानकारी दिए । 

सोमवार विहान आपूर्ति, वाणिज्य तथा उपभोक्ता हित संरक्षण विभागको नेतृत्वमा गएको टोलीलाई तरकारी व्यापारीले नियन्त्रणमा लिएका थिए । 

तरकारी बजारको अनुगमन गर्ने क्रममा सरकारी टोलीले दुईवटा ट्रक नियन्त्रणमा लिएपछि व्यवसायी तथा विचौलियाको समूहले अनुगमन टोलीलाई थुनेको थियो । 

वाणिज्य, आपूर्ति तथा उपभोक्ता संरक्षण विभागको अनुगमन टोली सोमबार बिहान ३ बजे अनुगमनका लागि पुगेको थियो । टोलीलाई प्रहरीले ‘स्कर्टिङ’ गरेर बजारबाट बाहिर निकालेको थियो । 

अनुगमन टोलीलाई व्यवसायीले नियन्त्रणमा लिएपछि उद्योग, वाणिज्य तथा आपूर्ति मन्त्री मात्रिका यादव आफैं कालिमाटी पुगेका थिए । 
 

भदौ ४, २०७५ मा प्रकाशित

प्रतिक्रिया दिनुहोस