बुटवल – बुटवल–भैरहवा हुँदै बेलहियासम्म जाने यात्रुले माइक्रो बसमा घुँडा खुम्चाएर यात्रा गर्नुपर्ने बाध्यता अब अन्त्य हुने भएको छ ।

सिद्धार्थ यातायात व्यवसायी प्रालिले भदौको तेस्रो हप्तादेखि यो रूटमा वातानुकुलित (एसी बस) सञ्चालन गर्ने भएको छ । जिल्लामै पहिलो पटक प्रालि अन्तर्गत दर्ता भएर सञ्चालनमा आएको सिद्धार्थले बुटवल–बेलहिया रूटमा ६ वटा ठूला एसी गाडी सञ्चालन गर्न लागेको हो ।

हालसम्म देशका कुनै पनि शहरका स्थानीय रूटमा एसी बस सञ्चालन भएका छैनन् । प्रालि सञ्चालक समिति अध्यक्ष सुर्यकुमार सारूले यात्रुको आवश्यकतालाई मध्यनजर गरी ३५ सिट क्षमताका एसी गाडी भित्र्याउन थालिएको बताए । अहिले २२ सिट क्षमताका मझौला माइक्रो बस सञ्चालनमा छन् । 

‘बुटवल–तिलोत्तमा–भैरहवा–लुम्बिनी अब एउटै शहरको रूपमा विकास भएको छ,’ अध्यक्ष सारूले भने, ‘यति ठूलो शहरमा अब २०/२२ जना यात्रु सिटका गाडी चलाएर हुँदैन । अब पोखरा, काठमाडौंमा चलेकाजस्तै ठूलो सिटी बसको आवश्यकता देखियो । सोही आवश्यकतालाई मध्यनजर गरेर हामीले पहिलो चरणमा ३ करोड ३३ लाख रूपैयाँ लगानीमा ६ वटा नयाँ ठूला गाडी भित्र्याउन लागेका हौं ।’ 

सारूले थपे, ‘ती गाडी गोलपार्क–बेलहिया बेलहिया–तौलिहवा र लुम्बिनी सौराहा चल्ने छन् ।’ बुटवल–बेलहिया सडक ६ लेनमा निर्माणाधीन छ । हालसम्म ८० प्रतिशत काम सम्पन्न भएको छ । प्रालिले १० वटा माग गरेको थियो । कम्पनीमा तयार भएका गाडी नभएपछि तत्कालले ६ वटा चलाउने छ । छिट्टै गाडीहरू थप गरी ३० वटा पुर्याउने प्रालिले जनाएको छ । ३० वटा गाडी सञ्चालनमा आएपछि हरेक गाडी १०/१० मिनेटको अन्तरमा छुट्ने छन् ।

ती गाडी सबै अपाङ्गमैत्री हुने छन् । अपाङ्गता भएका व्यक्ति ह्वील चेयरबाट गाडीमा चढ्न सक्ने सञ्चालक शंकर पराजुलीले जानकारी दिए । गाडीको भाडादर पनि नेपाल सरकारले तोकेबमोजिम हुनेछ । डिलक्स गाडीले सरकारले तोकेकोभन्दा २० प्रतिशत बढी लिन पाउने छन् । एसी गाडीले त्यसमा पनि २० प्रतिशत बढी लिन पाउने सरकारी नीति छ ।

‘बुटवल–बेलहिया अहिले ६० रूपैयाँ भाडा छ । हाम्रा एसी सञ्चालनमा आएपछि बुटवल बेलहियाबसमा समग्रमा ८० रूपैयाँ पर्छ,’ सारूले भने । प्रालिले चलाउने गाडीमा परिचालक महिला हुने छन् । महिला परिचालक भएपछि महिलालाई सम्मान गर्ने छन् । बसमा इन्टरनेसनको सुविधा पनि हुनेछ ।

सार्वजनिक यातायात भरपर्दो र स्तरीय नहुँदा निजी सवारीसाधन प्रतिवर्ष १० प्रतिशतका दरले थपिँदै गएको यातायात व्यवस्था कार्यालयको बताउँछ । जसले गर्दा काठमाडौं उपत्यका बाहिरका शहरी क्षेत्रमा समेत ट्राफिक जामको समस्या देखिन थालेको छ । अब छोटो रूटमा ठूला गाडी सञ्चालन गरी साना गाडी बिस्तारै विस्थापित गर्नुको विकल्प नभएको सञ्चालक पराजुलीको भनाइ छ । 

‘ठूला सवारीसाधन चलाउँदा पेट्रोलियम पदार्थको खपत पनि कम हुन्छ ।  साना सवारीसाधनले कम यात्रु बोक्छन्, जाम बढी गराउँछन् । यस आधारमा ठूला सवारीसाधनले मुलुकलाई आर्थिक रूपमा फाइदा पु¥याउँछ ।’ यस क्षेत्रमा बाक्लो बस्ती बढ्दै गएको र सर्वसाधारणलाई सहज र सरल तरिकाले आवतजावत गराउन ठूला गाडी चलाउन सबै क्षेत्रबाट दबाब समेत आइरहेको छ ।