काठमाडौं – बिमस्टेक सम्मेलनका लागि स्वास्थ्य मन्त्रालयले स्वास्थ्य सुरक्षासम्बन्धी सम्पूर्ण तयारी पूरा गरेको छ ।

भदौ १४ र १५ गते नेपालमा हुने बिमस्टेक सम्मेलनका लागि आउने विशिष्ट पाहुनाहरूलाई सरकारले विशेषज्ञ सहितको विशिष्ट स्वास्थ्य सेवा उपलब्ध गराउने तयारी गरेको हो । 

स्वास्थ्य तथा जनसंख्या मन्त्रालयले सचिव पुष्पा चौधरीको संयोजकत्वमा १० सदस्यीय समिति गठन गरी तयारी गरेको मन्त्रालयका हेल्थ इमर्जेन्सी एन्ड डिजास्टर म्यानेजमेन्ट युनिट प्रमुख चूडामणि भण्डारीले जानकारी दिए ।  

विशिष्ट पाहुनाको स्वास्थ्य सुरक्षाका लागि विमानस्थल, सम्मेलनस्थल र बासस्थानमा स्वास्थ्य सुरक्षाका लागि भेन्टिलेटरसहितको एम्बुलेन्स र  स्वास्थ्यकर्मीको टोली तयारी अस्थामा राखिने भण्डारीले बताए ।

उनले भने, ‘सम्मेलनका लागि आउने पाहुनाहरूका लागि स्वास्थ्य सुरक्षा तयारी पूरा भइसकेको छ । एम्बुलेन्स, विशेषज्ञसहितको स्वास्थ्यकर्मी र अस्पतालहरू सबै तयारी अवस्थामा छन् ।’

मन्त्रालयले नेपाल एम्बुलेन्स सर्भिससँग समन्वय गरी भेन्टिलेटर सहितको ए ग्रेडका ११ वटा एम्बुलेन्स तयारी अवस्थामा राखेको उनको भनाइ छ ।

प्रत्येक एम्बुलेन्समा मेडिकल अफिसरसहतिको ३ जनाको टोली रहने छ । सम्मेलनका लागि आउने पाहुनाका लागि विमानस्थलदेखि सम्मेलनस्थलसम्म भेन्टिलेटरसहितका एम्बुलेन्सहरू परिचालन गरिने छन् ।

ती एम्बुलेन्स सम्मेलन अवधिभर पाहुनाहरू रहेकै स्थानमा राखिने छन् ।

सम्मेलन हुने स्थान सोल्टी होटलमा जनरल फिजिसिय, सर्जन, अर्थोपेडिक सर्जन, एमडी जनरल प्राक्टिस्नर, एनेस्थेसियोलोजिस्ट, हेल्थ असिस्टेन्ट, ल्याब असिस्टेन्ट तथा नर्ससहितको ८ जनाको टोली सम्मेलन अवधिभर आकस्मिक उपचारका लागि तयारी अवस्थामा रहनेछन् ।

सम्मेलन अवधिभर आकस्मिक सेवाका लागि मन्त्रालयले काठमाडौंका सरकारी तथा निजी अस्पतालहरूलाई तयारी अवस्थामा रहन निर्देशन समेत दिइसकेको छ ।

त्रिभुवन विमानस्थलमा आकस्मिक स्वास्थ्य उपचार सेवाका लागि निजामती अस्पताल र काठमाडौं मेडिकल कलेजलाई जिम्मेवारी तोकिएको छ । वीर, टिचिङ, प्रहरी अस्पताललाई आकस्मिक मेडिकल टोलीसहित आईसीयूसहितको विशिष्ट तथा अतिविशिष्ट उपचार कक्षको व्यवस्था गर्न र एम्बुलेन्स सेवाको व्यवस्थापन गर्न निर्देशन दिइसकेको छ ।

यस्तै पाटन अस्पताल, नेपाल मेडिसिटी अस्पताल, नर्भिक अस्पताल र ग्रान्डी अस्पतालमा पनि आईसीयू तथा इमर्जेन्सी सेवा तयारी अवस्थामा छन् । मन्त्रालयले नेपाल मेडिसिटी र ग्रान्डी अस्पताललाई आकस्मिक एयर एम्बुलेन्स समेत तयारी अवस्थामा राख्न निर्देशन दिइसकेको छ ।

सम्मेलन अवधिभर स्वास्थ्य सुरक्षा व्यवस्थापनका लागि ११ लाख खर्च हुने मन्त्रालयले जनाएको छ ।