काठमाडौं – सत्तारुढ घटक नेकपाका एक प्रभावशाली नेताले प्रधामनन्त्री केपी ओली नेतृत्वको सरकारविरुद्ध घेराबन्दी भइरहेको बताएका छन् ।

प्रतिनिधिसभाको सोमवार बसेको बैठकको शून्य समयमा नेकपाका नेता खगराज अधिकारीले सरकार शान्तिसुरक्षा र अमनचयनका लागि क्रियाशील रहे पनि घेराबन्दी भएको दाबी गरेका हुन् । 

‘आज मलाई ०१७ पछिका घटना र उपद्रवको सम्झना भइरहेको छ, बीपी कोइरालाको सरकारविरुद्ध साधुसन्त महाराजहरूले समाजमा अनेकौं उपद्रव मच्चाउने र संसदमा गोरखा परिषद् टेकोपूर्ण गरिरहने, यही बहानामा महाराजले प्रजातन्त्र खोस्ने,’ सांसद अधिकारीले संसदमा भने, ‘इतिहास त्यही वृत्तमा दोहोरिन सक्दैन । तर त्यही प्रवृत्ति पुनरावृत्ति हुन सक्छ । सरकार आज शान्ति सुरक्षा र अमनचयनका लागि क्रियाशील छ । विकास निर्माणका लागि लागिरहेको छ । यसविरुद्ध सबै प्रकारका घेराबन्दी भइरहेको छ । सबै मिलेर पहिला गणतन्त्रलाई बलियो बनाऔं त्यसपछि परेड खेलौंला ।’

पूर्व स्वास्थ्यमन्त्री समेत रहेका अधिकारीले मुलुकी फौजदारी संहिताविरुद्ध चिकित्सकहरूको आन्दोलन नाजायज भएको टिप्पणी गरे । ‘मुलुकी फौजदारी संहिता कसुरको विषयलाई लिएर आज मुलुकभर स्वास्थ्य सेवा बन्द गरिएको छ ।

जनता पीडामा छन्, चिलबिल अवस्थामा छन्, सरकारले संसदको सम्बन्धित समितिमा आफ्नो प्रतिबद्धता लिखित रूपमा दिएको सुनिएको छ,’ अधिकारीले संसदमा भने, ‘तर कानून मिच्न किन उद्धत बनाइँदैछ ? किन हजारौंको मृत्युको कारण बन्दैछन् स्वास्थ्यकर्मीहरू ? किन स्वास्थ्य मन्त्रालयले खाली रहेका १२ तहमा नियुक्तिको पहल गर्दैन ? किन हडतालका आयोजकहरूलाई स्वास्थ्य मन्त्रालयको तालाचाबी दिइँदैछ ?’