सुर्खेत – आगामी भदौ २९ गते जुम्लामा हुने भनिएको लगानी सम्मेलन स्थगित भएको छ ।

काठमाडौंमा त्यही दिन अर्थसम्बन्धी राष्ट्रिय सम्मेलन हुन लागेकाले लगानी सम्मेलन स्थगन भएको आयोजक चन्दननाथ नगरपालिकाका मेयर कान्तिका सेजुवालले बताइन् । 

अर्थ सम्बन्धी राष्ट्रिय सम्मेलनका कारण ठूला लगानीकर्ता जुम्लामा आउने सम्भावना कम देखिएकाले बिहीवार बसेको नगर कार्यपालिकाको बैठकले सम्मेलन स्थगित गर्ने निर्णय गरेको उनले बताए । उनका अनुसार ठूला लगानीकर्ता, ठूला उद्योगी काठमाडौंमै रहने र जुम्ला आउने सम्भावना कम देखिएका कारण स्थगित गर्नुपरेको हो ।

‘अब लगानी प्रवद्र्धन सम्मेलन कहिले गर्ने भन्नेबारे मिति तय गरेका छैनौं,’ प्रमुख सेजुवालले भनिन्, ‘धेरै तयारी भइसकेका बेला स्थगित गर्नुपरेको छ । तर पनि हामी लगानी सम्मेलन भने गरिछाड्ने छौं ।’ उनले जुम्लाको समृद्धि र विकासका लागि लगानी स्म्मेलन आवश्यक रहेको बताइन् । 

‘जुम्लामा अपार सम्भावना छन्,’ उनले भनिन्, ‘ती सम्भावनालाई रुपान्तरण गरी जनजीविकामा प्रत्यक्ष प्रयोगमा ल्याउन पाए कर्णालीको समृद्धि सम्भव छ । त्यसैको लागि भएपनि जुम्लामा हामी लगानी सम्मेलन गर्नेछौं ।’