धनगढी– टीकापुर घटनासम्बन्धी मुद्धा अन्तर्गत आज (आइतवार) देखि साक्षी बकपत्र गराउने कार्य शुरु भएको छ ।

थरुहट/थारुवान आन्दोलनको क्रममा २०७२ भदौ ७ गते कैलालीको टीकापुरमा आन्दोलनकारी र प्रहरीबीच भएको दोहोरो झडप हुँदा एक नाबालकसहित ८ प्रहरीको ज्यान गएकाे घटनाको मुद्धाअन्तर्गत जिल्ला अदालत कैलालीले ३ वर्षपछि वादी र प्रतिवादी पक्षका साक्षी बुझी बकपत्र गराउँने कार्य थालेको हो ।

जिल्ला अदालत कैलालीका शाखा अधिकृत नारायण ओझाका अनुसार वादी पक्षका ३५ र प्रतिवादी पक्षका ५० जना गरी ८५ जना साझी अदालतमा उपस्थित भएका छन् । जसमध्ये वादी पक्षका ३ जनाबाट बकपत्र समेत गराएको शाखा अधिकृत ओझाले जनाए । वादी पक्षका दिपक न्यौपाने, शारदा कठायत र जंगबहादुर साउँदबाट बकपत्र गराएको हो ।

बकपत्र गराउने कार्य अदालतले असोज १२ गतेसम्म समय निर्धारण गरेको छ । साक्षीहरुको अनुकुलतालाई मध्यनजर गरी दैनिक ५/६ जनाको दरले बकपत्र गराइने जनाइएको छ ।

घटनावारे साक्षीहरुबाट गराएको बकपत्रको कार्य सकिएपछि मात्रै पेशीको अर्को चरण अर्थात बहसको कार्य सुरु हुने अदालतका श्रेष्तेदार इन्द्रबहादुर कठायतले बताए ।

घटनाको अभियोगमा 'सांसद' रेशमलाल चौधरीसहित २६ जना पुर्पक्षका लागि कारागार चलान गरिएका छन् । जसमध्ये रेशम चौधरी काठमाडौंको दिल्लीबजारस्थित सदरखोर कारागार, दुई नाबालक पोखरास्थित बाल सुधार गृहमा र बाँकी कैलाली कारागारमा थुनामा रहेका छन् ।

उनीहरूविरुद्ध कर्तव्य ज्यान, ज्यान मार्ने उद्योग र डाँका चोरी मुद्दा चलाएको जिल्ला अदालत कैलालीले जनाएको छ ।