रुपन्देही– रुपन्देही जिल्लाका विभिन्न स्थानमा भाइरल ज्वरोका बिरामी बढेका छन् । विगत केही दिनदेखि छिनमा पानी आउने र तुरुन्तै घाम लाग्ने मौसम भएसँगै भाइरल ज्वरोका बिरामीको संख्यमा वृद्धि भएको हो । 

गर्मी मौसम र वर्षाको समयका कारण बिरामी बढेको अस्पतालका चिकित्सक बताउछन् । लुम्बिनी अञ्चल अस्पताल बुटवलमा अहिले दैनिक एक हजार बढी बिरामी उपचारका लागि आउने गरेका छन् । 

विगत केही दिनदेखि बिरामीको चाप बढेपछि अस्पतालमा शय्याको समेत अभाव भएको छ । जसका कारण बिरामी भुइँमा बसेर उपचार गराउन बाध्य भएका छन् । लुम्बिनी अञ्चल अस्पताल बुटवलले जिल्लाका विभिन्न स्थानबाट भाइरल ज्वरोका बिरामी उपचारका लागि आउने गरेको जनाएको छ । 

टाउको दुख्ने, ज्वरो आउने र शरीर दुख्ने तथा खोकी लागेका बिरामी उपचारका लागि आउने गरेको छन् ।