सुर्खेत – कर्णाली प्रदेशको राजधानी वीरेन्द्रनगर नगरपालिकाको सुरक्षा व्यवस्था हेर्ने नगर प्रहरी कार्यालयमा दरबन्दी अभावका कारण शान्ति सुरक्षा प्रदान गर्न समस्या भएको छ ।

राजधानी भइसकेको र दिनप्रतिदिन घटना बढ्ने, भीआईपीको सुरक्षा गर्ने, अदालतमा बकपत्र गराउन लैजानुपर्ने, नगरका चोकमा प्रहरी तैनाथ गर्नुपर्ने हुँदा प्रहरीको दरबन्दी कम भएकाले शान्ति सुरक्षा कायम गर्न समस्या भएको प्रहरी नायव निरीक्षक (सई) तेजबहादुर खड्काले बताए । 

‘हामीसँग अहिले भान्सेसहित ४६ जना रहेका छन्,’ उनले भने, ‘नगरभरिलाई नै सुरक्षा प्रदान गर्नुका अतिरिक्त अन्य काममा पनि नगर प्रहरी नै खट्ने भएका कारण हामीलाई काम गर्न असहज भएको छ । साधन स्रोतको अभाव भएका कारण पनि यस्तो समस्या देखिएको हो ।’

सई खड्काले मंगलगढी चौकमा प्रहरी खटाउन नसकिएको बताए । ‘भीभीआईपीको कार्यक्रम भएको खण्डमा त्यहाँ प्रहरी खटाउनुपर्ने हुन्छ,’ उनले भने, ‘हरेक चोकमा राख्न चाहेपनि जनशक्ति अभावका कारण हामीले राख्न सकेका छैनौं ।’

उनले वीरेन्द्रनगरमा जिल्ला वा अदालतबाट वडा नम्बर तोकेर बकपत्र गराउन ल्याउन आदेश दिइने तर कुन ठाउँमा हो, कहाँ हो जानकारी नहुने भएका कारण त्यसको प्रत्यक्ष असर कार्य प्रणालीमा परेको बताए । ‘आदेश भएपछि खोज्नै पर्यो । यसरी खोज्न निस्कँदा कहिलेकाही त एक दिन पूरै लाग्छ,’ उनले थपे, ‘यही कारण पनि जनशक्ति अभाव भइरहन्छ ।’

उनले वीरेन्द्रनगरका लागि कम्तिमा पनि ७५ जना जनशक्ति आवश्यक पर्ने बताए । ‘समग्र नगरको शान्ति सुरक्षालाई चुस्त र दुरुस्त बनाउन कम्तिमा पनि ७५ जनाको दरबन्दी आवश्यक छ,’ उनले भने, ‘दरबन्दीसँगै गाडीको पनि आवश्यकता छ ।’ अहिले नगर प्रहरी कार्यालयमा एउटा भ्यान रहेको बताउँदै भ्यानले नै अहिलेसम्म धानिरहेको बताए ।

यता, जिल्ला प्रहरी कार्यालय सुर्खेतका प्रहरी उपरीक्षक बसन्त रजौरेले नगर प्रहरी कार्यालयलाई अपग्रेड गर्न माग गरिसकिएको बताए । ‘नगर क्षेत्रभित्र हुने सबै काम नगर प्रहरीको हो । उसका भूमिका धेरै भएकाले हामीले इन्सपेक्टरको नेतृत्वमा रहने गरी नगर प्रहरी कार्यालय बनाउने माग गरेका छौं,’ उनले भने, ‘त्यसो भएको खण्डमा त्यहाँ जनशक्ति पनि थपिने भएकाले नगरको सुरक्षा व्यवस्था सुदृढ हुने अपेक्षा हाम्रो छ ।’